Müdafiə naziri: Böyük Britaniya silahlı qüvvələri çox ciddi problemlərlə üz-üzədir

Poliqon xəbər verir ki, bu barədə Sky News məlumat yayıb.

Con Hili bu barədə Britaniyanın Kral Birləşmiş Xidmətlər İnstitutunun (RUSI) konfransında danışıb: "Biz döyüşməyə hazır olmalıyıq, amma öz aramızda yox... Mən həqiqətən köhnə bölgüləri arxada qoymaq istəyirəm".

Onun sözlərinə görə, silahlı qüvvələrin hər üç komponenti (quru, donanma, hərbi hava qüvvələri-red.) qüvvələrin tükənməsi, satınalmalarda qanunsuzluq, mənəvi-psixoloji durumun aşağı olması, işçilərin qəbulu və saxlanılmasında böhran kimi problemlərlə üzləşib.

Bundan əlavə, veteranlar layiq olduqları xidmətlərdən istifadə edə bilmirlər.

Nazir əlavə edib ki, Britaniyada yeni Leyboristlər hökuməti hakimiyyətə gəldikdən iki həftə sonra bu problemlərin partiyanın əvvəllər düşündüyündən qat-qat ciddi olduğu nəzərə çarpıb.

Bundan əvvəl Britaniya Müdafiə Nazirliyinin departamentlərindən birinin keçmiş rəhbəri Rob Conson demişdi ki, Silahlı Qüvvələr ölkə ərazisini lazımi səviyyədə qoruya bilmir və hər hansı miqyasda münaqişəyə hazır deyil. Consonun sözlərinə görə, Britaniya Silahlı Qüvvələri mütləq minimum əsasında fəaliyyət göstərir ki, bu da onlara yalnız sülhməramlı və humanitar əməliyyatlar, habelə mülki şəxslərin döyüş bölgələrindən təxliyəsi və bəzi təxribat əleyhinə tədbirlər həyata keçirməyə imkan verir.

Poliqon.info