Baş redaktor: "Zərdabinin ruhu şaddır"

Bəs Azərbaycan mətbuatının bugünkü durumu nə yerdədir?

Tanınmış jurnalistlər mövzu ilə bağlı fikirlərini Azxeber.com-a bildiriblər.

"Bakupost.az" saytının baş redaktoru və rəhbəri Elçin Zahiroğlu jurnalistikanın həm iqtisadi, həm məzmun baxımından ağır dövrünü yaşadığını bildirir:

"Bu gün hamı jurnalistləri təbrik edir. Jurnalistlər isə təbriklərİn enerjisindən istifadə edib daha çox düşünməlidirlər. Problemləri, çatışmazlıqları, hədəfləri, dünya mediasının gəldiyi nöqtəni, sosial şəbəkələrlə rəqabəti, nüfuzu, reputasiyanı. Bunların hər biri düşündürücü məqamlardır. Son illərdə media sahəsində müəyyən nizam-intizam yaransa da, uğurlu layihələrə imza atılsa da, Azərbaycan jurnalistikası həm iqtisadi, həm də məzmun baxımından ağır dövrünü yaşayır.

Baş redaktor bildirib ki, peşəkar jurnalistlər mediadan uzaqlaşır:

"Saytların təhlükəsizliyi, peşəkar kadr çatışmazlığı kritik həddədir. Ən yaxşı jurnalistlərimiz mediadan uzaqlaşır, ya yeni peşə seçmək məcburiyyətində qalır, ya da ayrı-ayrı qrumlar tərəfindən acımasıcasına "ovlanıb", məmurlaşdırılırlar. Bəlkə də bu, bir qəsdir. Jurnalistika sürətlə öz ecazkarlığını itirir, prespektivsiz sahə imicini qazanır. Bəzi məmurlar hansısa məqsəd üçün medianı alətə çevirməyə çalışırlar. Dərd burasıdır ki, sadə insanlar da sevmirlər, çünkü inamları azalıb. Bu baxımdan, "biz hara gedirik" sualına cavab verilməlidir. Kənardan bu sahəyə baxanda adama elə gəlir ki, mediamız 4 təkər üstünə qoyulub, üzü aşağı buraxılıb, istiqamət haradır, demək çətindir. Ən azı ona görə ki, nə sükan əlimizdədir, nə də əyləcə ayağımız çatır... Bütün hallarda mən optimizimin tərəfindəyəm, Azərbaycan mətbuatı özündə güc tapıb, hamar yola çıxacaq”.

Pravda.az saytının baş redaktoru İlkin Pirəli isə həmkarından fərqli olaraq düşünür ki, Azərbaycan mətbuatı intibah dövrünü yaşayır:

"Azərbaycan mətbuatı intibah dövrünü yaşayır. Dövlət güclü, qüdrətlidirsə, mətbuatı da o cürdür. Cənab Prezident İlham Əliyevin çıxışlarında qeyd edir ki, Azərbaycan heç vaxt indiki qədər güclü olmayıb. Doğrudur! Bunu media sahəsinə də aid etmək olar. Hər kəsə məlumdur ki, Vətən müharibəsindən sonra dövlətimiz beynəlxalq arenada diktə edən tərəfə çevrilib, ölkəmiz cənab İlham Əliyevin rəhbərliyi ilə yeni reallıq yaradıb, dünya ölkələri bu reallığı qəbul etməyə məcbur olub. Çünki Azərbaycanın həyata keçirdiyi siyasət xalqların sülh şəraitində yaşamasına istiqamətlənib. Artıq Cənubi Qafqaz münaqişə ocağı deyil, buradan dünyaya sülh mesajları verilir. Belə olan halda, Azərbaycan həqiqətlərinin dünyaya çatdırılmasında ölkə mediasının üzərinə mühüm vəzifələr düşür.

Hesab edirəm ki, Azərbaycan jurnalistləri bu işin öhdəsindən layiqincə gəlirlər. Son illərdə media sahəsində həyata keçirilən islahatlar - Azərbaycan Respublikası Medianın İnkişafı Agentliyinin yaradılması, vahid reyestrin formalaşması, media subyektlərinə dövlət dəstəyi bu sahənin inkişafına təkan verib. Mətbuatımızın əsasını dahi mütəfəkkir Həsən Bəy Zərdabi qoyub, əminik ki, onun ruhu şaddır”.

Poliqon.info