Fransa və ABŞ hərbçiləri Cənubi Qafqazda hərbi əməliyyatlarda iştirak edirlər?

Hərbi-ekspert: “Son təxribatlarda ABŞ və Fransanın verdiyi silahlardan istifadə olunması tamamilə gözləniləndir”.

“Əgər zərurət yaranarsa, bu mövqelər bizim üçün hansısa əhəmiyyət kəsb edərsə, o mövqelərdə mütləq Azərbaycan əsgəri və Azərbaycan bayrağı yerləşdirilməlidir”.

Bu sözləri hərbi-ekspert Ədalət Verdiyev Fransa və ABŞ hərbçilərinin nəzarəti altında ermənilərin mövqelərimizi atəşə tutmasını Poliqon-a şərh edərkən qeyd edib ki.

Yayılan məlumatlara görə, Fransa və ABŞ hərbçilərinin nəzarəti altında ermənilər iyulun 21-də Kəlbəcər istiqamətində Azərbaycan mövqelərini ölümcül fransız silahları ilə atəşə tutublar. Məlumata görə bunun üçün Fransa və ABŞ hərbçiləri öz ölkələrinin rəhbərliyi səviyyəsində razılıq alıblar.

Fransa və ABŞ hərbçilərinin artıq Cənubi Qafqazda hərbi əməliyyatlarda iştirakını necə dəyərləndirmək olar və bu açıq təcavüzkar addıma Azərbaycan necə cavab verməlidir?

Mövzunu Poliqon-un əməkdaşı hərbi-ekspert Ədalət Verdiyev ilə müzakirə edib.

Ədalət Verdiyev: “Azərbaycan bu təxribatların qarşısını kifayət qədər sərt bir şəkildə almalıdır”.

Azərbaycana qarşı atəş açan düşmən mövqelərinin darmadağın edilməli olduğunu qeyd edən ekspert Poliqon-a açıqlamasında qeyd edib ki, terrorçular məhv edilməlidir:

“Real şəraitdə Azərbaycan ordusuna qarşı atəşkəsin pozulması Ermənistanın dövlət və milli maraqlarına ziddir. Lakin bu təxribatların törədilməsində maraqlı olan qüvvələr var. Bu qüvvələrin də rəhbəri əsasən ABŞ və Fransadır. Prosesləri də ABŞ və Fransa hərbiçiləri həyata keçirir.

Son təxribatlarda ABŞ və Fransanın verdiyi silahlardan istifadə olunması tamamilə gözləniləndir. Belə silahlardan istifadə növbəti bir münaqişə ocağı yaratmaq, mövcud olan kövrək sülh prosesinə ziyan vurmaq və məhz bu proseslər fonunda Ermənistan ərazisində kənar qüvvələrin hərbi kontingentinin daha geniş miqyasda yerləşdirilməsinə nail olmaq məqsədi kənardan aşkar şəkildə görünür.

Azərbaycan bu təxribatların qarşısını kifayət qədər sərt bir şəkildə almalıdır. Azərbaycana qarşı atəş açan düşmən mövqeləri darmadağın edilməlidir, oradakı terrorçular tamamilə məhv edilməlidir. Əgər zərurət yaranarsa, bu mövqelər bizim üçün hansısa əhəmiyyət kəsb edərsə, o mövqelərdə mütləq Azərbaycan əsgəri və Azərbaycan bayrağı yerləşdirilməlidir”.

Nərminə UMUDLU
Poliqon.info