Politoloq: İran prezidenti kim seçilirsə-seçilsin, Rəisinin yürütdüyü Cənubi Qafqaz siyasəti davam etdiriləcək...

Azər Qasımov: “İranın Azərbaycan və Ermənistana qarşı siyasəti yeni formalaşmayıb ki, kiminsə prezident seçilməsi ilə dəyişsin”.

“İranda növbədənkənar prezident seçkiləri gözlənildiyindən fərqli keçməyəcək və böyük ehtimalla rejimin üstünlük verdiyi şəxs prezident olacaq”.

Bu sözləri politoloq Azər Qasımov İranda keçirilməsi gözlənilən prezident seçkilərini Poliqon-a şərh edərkən qeyd edib.

Bildiyimiz kimi, İranda prezident seçkisinə bir neçə gün qalıb. Müxtəlif rəy sorğularına və aparılan müşahidələrə görə, rəqabət əsasən 3 namizəd - Milli Təhlükəsizlik Şurasının keçmiş baş katibi Səid Cəlili, Təbrizin millət vəkili, sabiq səhiyyə naziri Məsud Pezeşkiyan və parlamentin sədri Məhəmməd Baqir Qalibaf arasında gedəcək. İrandakı soydaşlarımız azərbaycanlı namizəd Məsud Pezeşkiyana dəstək verilməsini lazım bilir.

Eyni zamanda islahatçıların namizədi olan Məsud Pezeşkiyanın qalib gəlməsi halında İranın Azərbaycan və Ermənistanla bağlı siyasətində dəyişiklik ola bilərmi? Həmçinin digər namizədlərin Azərbaycan və Ermənistanla bağlı mövqeləri İbrahim Rəisinin yürütdüyü siyasətdən fərqli olacaqmı?

İranın Azərbaycan və Ermənistan siyasətini Poliqon-un əməkdaşı politoloq Azər Qasımov ilə müzakirə edib.

Azər Qasımov: “Rəisinin ölümü Azərbaycandan qayıdarkən baş verdi. Bu səbəbdən onun ölümü şüur altında seçilən hər kəs üçün bir mesaj olaraq qalacaq”.

Azərbaycanlı seçicilərin favoritinin olmasının onlara da bir təsəlli olduğunu vurğulayan politoloq Poliqon-a açıqlamasında qeyd edib ki, seçiləcəyi durumda onun hansısa yeniliklər edəcəyi və ya azərbaycanlılara qarşı münasibətin dəyişəcəyini gözləmək sadəlövhlük olardı:

“İranda növbədənkənar prezident seçkiləri gözlənildiyindən fərqli keçməyəcək və böyük ehtimalla rejimin üstünlük verdiyi şəxs prezident olacaq. İranda prezident seçkilərinin mahiyyəti də bəllidir. İcra məqamı olan prezident vəzifəsinin İranın siyasi xəttində yenilik etməsi mümkün deyil. Seçkiyə buraxılan namizədlərin isə bəzi siyasi qruplaşmaların ambisiyalarını təmin etmək üçündür. Amma kimin seçilməsindən asılı olmayaraq namizədlər vahid siyasi xətti dəstəkləyir.

Təbii ki, azərbaycanlı seçicilərin favoritinin olması onlara da bir təsəllidir. Seçiləcəyi durumda onun hansısa yeniliklər edəcəyi və ya azərbaycanlılara qarşı münasibətin dəyişəcəyini gözləmək isə sadəlövhlük olardı.

Azər Qasımov: “İran rejiminin Azərbaycan və Ermənistan siyasəti ideologiyaya əsaslanır və bu dəyişmir”.

İranın Cənubi Qafqaz siyasətinə gəlincə, İranın Azərbaycan və Ermənistana qarşı siyasəti yeni formalaşmayıb ki, kiminsə prezident seçilməsi ilə dəyişsin. İran rejiminin Azərbaycan və Ermənistan siyasəti ideologiyaya əsaslanır və bu dəyişmir. Azərbaycan hələ müstəqil olmayıb, Sovet İttifaqının tərkibində olanda belə azərbaycanlılara və ermənilərə olan münasibət indikindən fərqlənmirdi.

Təbii ki, ritorikada hansısa yaxşı münasibətlərdən danışmaq olacaq. Amma İran prezidenti kim seçilirsə-seçilsin, Rəisinin yürütdüyü Cənubi Qafqaz siyasəti davam etdiriləcək. İranda prezident kim olursa-olsu Rəisidən uzağa gedə bilməyəcək. Uzağa gedənin taleyini hər kəs gördü. Hesab etmirəm ki, Rəisinin ölümü Azərbaycanla bağlı idi. Ancaq Rəisinin ölümü Azərbaycandan qayıdarkən baş verdi. Bu səbəbdən onun ölümü şüur altında seçilən hər kəs üçün bir mesaj olaraq qalacaq”.

Nərminə UMUDLU
Poliqon.info