Boliviya prezidenti Luis Arse dövlət çevrilişinə cəhddə iştirak edən hərbçilərin hərəkətləri nəticəsində ölkədə ən azı 14 nəfərin yaralandığını bildirib...
Poliqon xəbər verir ki, bu barədə Boliviya TV məlumat yayıb.
Prezident zərərçəkənlərdən bir neçəsinin əməliyyata ehtiyacı olduğunu deyib. Boliviya lideri hərbçilərin insanlara atəş açdığını vurğulayıb.
Boliviya Müdafiə Nazirliyinin rəhbəri Edmundo Novillo isə bildirib ki, ölkə prezidenti Luis Arsenin Rusiya Federasiyasına səfəri dövlət çevrilişinə cəhdə səbəb olan amillərdən biri ola bilər. O, Luis Arsenin Rusiyaya səfərinin uzun müddət Boliviyada dominantlıq edən və dövlət resurslarını talamaq üçün yenidən ölkədə siyasi nəzarətə sahib olmaq istəyən BRICS-ə müxalif dövlətlərdə reaksiyaya səbəb ola biləcəyini istisna etməyib.
İyunun 26-da Boliviyada dövlət çevrilişinə cəhd olub. Üsyançı general Xuan Xose Zuniqa ordu komandiri vəzifəsindən azad edilməsi ilə razılaşmayıb və demokratiyanı bərpa etməyi və siyasi məhbusları azad etməyi tələb edib. Boliviya prezidenti Luis Arse mühasirəyə alınan hökumət sarayından ordunun yüksək komandanlığını dəyişib və tərəfdarlarını demokratiyaya dəstək üçün meydana çıxmağa çağırıb. Bir neçə saat sonra qiyam yatırılıb, hərbçilər La Pazın mərkəzini tərk edib və general Zuniqa saxlanılıb.
Poliqon.info