“Şərurlu İsfəndiyar 100 min pul istədi” - Evi alınan şəhid xanımı

Axundova bildirib ki, Ali Məhkəmənin ötən gün çıxardığı ədalətsiz qərardan ölkə rəhbərliyinə müraciət edib: “Çünki söhbət inşaat maqnatı Şərurlu İsfəndiyar və şəhid ailəsindən gedir. Burada iki qonşunun sadə pay bölüşdürməsi məsələsindən bəhs edilmir. Bu ağırlığı hiss edirsinizmi? O da bilir ki, burada şəhid ailəsindən söhbət gedir. Ancaq birmənalı qeyd edir ki, biznesmendir və bu, onun biznes siyasətidir”.

Şəhid xanımı qeyd edib ki, dünənki prosesi hakim Əsəd Mirzəliyev aparıb. Məhkəmədə onlar hər şeyin hüquq və qanun çərçivəsində həll olunmağına tərəfdar olduqlarını bildirdilər. “Hətta dedilər ki, yalnız hüquqdan və qanundan danışaq. Əlavə heç bir rəy deməməyimizi tələb edirdilər. Hakim Əsəd Mirzəliyev dəfələrlə vurğulayırdı ki, haqqımızda məlumat materialda var. Bunu deməyə ehtiyac yoxdur. Dedim ki, anlamıram, mənzilin mənim pulumla tikildiyini vurğulamalı deyiləm? Bunu demək sizi narahat edirmi? Yəni, bir sözlə, məhkəməyə girəndə hər şey bəlli idi. Bizi dinləməməyə, söz verməməyə çalışırdılar. İsfəndiyarın vəkili Ramiq Axundov bizə qarşı çox böyük hörmətsizlik etdi. Dedi ki, şəhid ailəsinin məhkəməyə və onlara heç bir aidiyyatı yoxdur”, -Axundova danışıb. Şəhid xanımının sözlərinə görə, hakimə sual verərək soruşub ki, bunları hamının, Ali Məhkəmənin qarşısında utanmadan, çəkinmədən deyirmi? “Bəs, bu məhkəmədən, xalqdan, dövlətdən ötrü bu gün məhkəmə fəaliyyət göstərsin, qanun yerinə yetirilsin deyə mənim yoldaşım kimi oğlan gedib canından keçib. Dedi ki, bəli, mən öz sözümün üstündə dururam. Bu çox böyük hörmətsizlikdir. O, Şərurlu İsfəndiyarın mövqeyini bildirirdi”.

Axundova vurğulayıb ki, dövlətdən, ya da Şərurlu İsfəndiyardan artıq heç nə istəmir, pul verib aldıqları evi istəyir. Onu da İsfəndiyar vermir: “Çünki o evin ikiqat pulunu bizdən istəyib. Biz 53 min pul ödəmişdik, 11 min borcumuz qalmışdı. Əvvəl bizdən 100 min, sonra 53 min pul istədi. Biz isə razılaşmamışıq. Bina təhvil veriləndən sonra, sakinlərdən ikiqat pul istədi. 76 ailə onunla razılaşdı. Kim ki razılaşdı müqaviləni yeniləyib kupçanı payladı. Kim ki, onun istədiyi məbləği vermədi, onları məhkəmələrdə süründürməyə başladı”. Şəhid xanımı əlavə edib ki, Ali Məhkəmədə kassasiya şikayətinə bir müraciəti də əlavə ediblər, eyni vəziyyətdə olan vətəndaş Məhkəməyə müraciət edərək Şərurlu İsfəndiyarı udub. İsfəndiyar vətəndaşı Apellyasiya Məhkəməsinə verib. Yenidən həmin sakin Ali Məhkəməyə verib, Ali Məhkəmə vətəndaşın tərəfində durub: “Ancaq bizim situasiyada Ali Məhkəmə Apellyasiyanın qərarını qüvvədə saxladı. Halbuki eyni şirkət, eyni bina, eyni müqavilədən söhbət gedir. Bizdə isə müqaviləni bəhanə etdilər. Dedilər ki, guya müqaviləniz saxtadır. O zaman siz bu saxta müqavilə ilə iki il bundan əvvəl başqa bir vətəndaş haqqında Apellyasiya Məhkəməsinin verdiyi qərarı ləğv etmisiniz və vətəndaşın xeyrinə qərar çıxarmısınız. Onda belə çıxır ki, özünüz özünüzü təkzib edirsiniz?!. İkincisi, İsfəndiyarla razılaşan 76 ailəyə həmin müqavilə ilə “kupça” verilib. Necə olur ki, onda o müqavilə saxta olmadı?!”

Axundova deyib ki, başqa yerdə bu cür iri inşaat şirkətləri şəhid ailələrinə mənzillərin açarlarını özləri verirlər, deyirlər biz milyonlar qazanırıq, oğullarımız isti evin içində oturub əsgərliyə də getmirlər. Amma sizin həyat yoldaşınız, ya oğlunuz gedib şəhid olub, canından keçib. Ancaq bunlar bizim özümüzkünə sahiblənirlər.

Qeyd edək ki, N. Axundova iki il əvvəl 45 saylı məktəbə direktor təyin olunub.(“Qafqazinfo”)

pia.az