Çinin XİN başçısı: Ukrayna Rusiya ilə danışıqlara hazırdır

Poliqon xəbər verir ki, Vanq Yi Çinin Ukraynaya humanitar yardımı davam etdirəcəyinə söz verib. O, həmçinin bildirib ki, Ukrayna münaqişəsinin gərginləşməsi təhlükəsi hələ də qalmaqdadır. Pekin münaqişənin danışıqlar yolu ilə siyasi həllinin tərəfdarıdır.

"Çin tərəfi hesab edir ki, bütün münaqişələrin həlli son nəticədə danışıqlar masasına qayıtmalı və bütün mübahisələrin həllinə siyasi vasitələrlə nail olunmalıdır", deyə Çin Xarici İşlər Nazirliyinin sözçüsü Mao Ninq nazirin sözlərindən sitat gətirib.

Dmitri Kulebanın Çinə səfəri iyulun 23-dən 26-dək nəzərdə tutulub. Onun məqsədi ikitərəfli əməkdaşlığı, eləcə də Ukrayna münaqişəsinin həllini müzakirə etməkdir.

Ötən həftə Ukrayna prezidenti Volodimir Zelenski deyib ki, dünya danışıqlara başlamaq üçün Rusiya hökumətinə təzyiq göstərməlidir. CNN-in məlumatına görə, Ukrayna prezidenti Rusiya Federasiyası ilə danışıqlara hazırdır, o cümlədən cəbhədəki çətin vəziyyətə görə. 

Vladimir Putin dəfələrlə bəyan edib ki, Rusiya danışıqlara hazırdır. İyun ayında o, Ukraynada hərbi əməliyyatların dayandırılması üçün şərtləri açıqlayıb. Xüsusilə, o, Kiyevi NATO-ya üzv olmaqdan imtina etməyə, həmçinin qondama Luqansk və Donetsk Xalq Respublikalarından, Xerson və Zaporojye vilayətlərindən öz inzibati sərhədləri daxilində qoşunları çıxarmağa çağırıb.

Poliqon.info