Qalib Salahzadə: “Nə mən Allahşükür Paşazadənin işlərinə, nə də o, mənim işlərimə qarışır”

Sabiq deputat Qalib Salahzadə Bilgəhdəki bağ evi məsələsində qudası şeyxülislam Allahşükür Paşazadənin onu müdafiə etməsi barədə səslənən iddialara münasibət bildirib.

Q.Salahzadə Pravda.az-a açıqlamasında iddiaların yalan olduğunu deyib. “2000-ci ildən bu yana belə bir söhbətimiz olub ki, nə mən şeyxin işlərinə, nə də şeyx mənim işlərimə qarışacaq. Ümumiyyətlə, mənim işlərimə heç kim qarışa bilməz. Şeyx hörmətli adamdır, ağsaqqaldır. Şeyxə hamımızın hörməti var. Azərbaycan balaca yerdir. Kimsə kiminləsə qohum olursa, indi nə edək? Bunlar boş şeylərdir”, - Q.Salahzadə bildirib.

O deyib ki, Bilgəhdəki bağ evi ilə bağlı məsələdə artıq məhkəmələr də nə edəcəklərini bilmirlər: “Məhkəmə işi hakim Şəbnur Qədirovada idi. O da gətirib atıb Tahirə Əsədovanın üstünə. Bu gün məhkəmə olub, Tahirə Əsədova da sentyabrın 30-na təyin edib. Əslində, “iki vur iki”dir. Mən o evdə qeydiyyatdayam. Məndən başqa da üç nəfər ailə üzvüm qeydiyyatdadır. Orda 8 ev tikdirmişəm. Mən nə istəyirəm məgər? Hər yerə müraciət edəndə açıq-aydın deyirəm ki, mütəxəssis, ekspertiza gəlsin, Rəsul Quliyevin torpağının hara düşməyini, mənim topağımla qonşu olmasını aydınlaşdırsın. Bu işlərin arxasında imkanlı adamlar var. Ağasif Şakiroğlu kimdir? Keçmişi qaranlıqdan da qaranlıq bir adamdır. Mən necə deyim ki, bu işin arxasında dayanan Ağasifdir? Ağasif deyil, Rəsul Quliyevin özü də deyil. Başqa-başqa adamlar var. İstəyirlər ki, Bilgəhdəki ərazini satın alsınlar”.

Q.Salahzadə işin arxasında kimlərin dayandığı barədə ad çəkmək istəməyib: “Kimə deyəsən ki, “sənsən”. Mən bilirəm kimlərdir. Çox yaxşı bilirəm. Gətirib 33 yaşında uşağı atıblar qabağıma ki, budur ey, get, vuruş. Mənim 70 yaşım var. Nəvəm yaşında uşaqdır. Gedib uşaqla vuruşum? Məhkəmələr də nə edəcəklərini bilmirlər, onlara da təzyiq edirlər, başlarına oyun gətirirlər. İndi hakimlər də ayılıblar, Şəbnur xanım cavan kadrdır, o da atır bunların üstünə. Bir tərəfdən də apellyasiya məhkəməsi var. Mən yolla keçirəm deyirəm ki, “bura mənimdir”. Elə şey olar? Ekspertiza baxmalıdır, Tahirə Əsədova torpaqölçəndir? Hakim necə deyə bilər ki, bu ev mənim deyil, sənindir. Pul alıblar Rəsul Quliyevdən, indi gəl sübut elə. Bəli, Rəsul Quliyevin pulu da, sözü də Azərbaycanda işləyir...”.