BP bu ilin sonunadək “Şəfəq-Asiman”da quyunun qazılmasına başlayacaq

BP şirkəti “Şəfəq-Asiman” perspektiv strukturunda ilk kəşfiyyat quyusunun qazılmasına 2019-cu ilin sonunda başlamağı planlaşdırır. Bu barədə  BP-nin Azərbaycan, Gürcüstan və Türkiyə regionunda əlaqələr, xarici işlər və strategiya üzrə vitse-prezidenti Bəxtiyar Aslanbəyli bildirib.

“Şəfəq-Asiman”da qazma işlərinin başlanılması bu ilin sonuna – dördüncü rübündə planlaşdırılır”, - deyə B. Aslanbəyli qeyd edib.

Onun sözlərinə görə, çox güman ki, bu sahədə qazma işləri "Heydər Əliyev" altıncı nəsil yarımdalma qazma qurğusu vasitəsi ilə həyata keçiriləcək.
"Şəfəq-Asiman" perspektiv strukturunda böyük qaz ehtiyatları olduğu ehtimal edilir.

Hazırda sözügedən qazma qurğusu Fransanın “Total” şirkəti tərəfindən “Abşeron” yatağında ABD-001 quyunun qazılması çərçivəsində istifadə edilir.

“Abşeron” yatağında işləri bitirdikdən sonra qurğu “Şəfəq-Asiman” strukturunda qazma işlərinə cəlb ediləcək.

Qeyd edək ki, “Caspian Driling” şirkətinin idarəçiliyi altında olan "Heydər Əliyev" qazma qurğusu Xəzər dənizində ən dərin quyunun qazılması üzrə rekorda imza atıb. Qazma işləri "Abşeron" (ABD-001 – quyu) yatağında aparılıb. Quyu 15 aprel 2019-cu il tarixdə saat 13:00-da 7 411 metr (ümumi ölçülmüş dərinlik) dərinliyə çatıb. Bu, Xəzər dənizində indiyədək qazılmış ən dərin quyudur. Qazma qurğusu “Caspian Driling”in rəhbərliyi altında 2017-ci ildə Xəzər tərsanəsində tikilib, sınaqdan keçirilib və qurğuya ümummilli lider Heydər Əliyevin adı verilib. Hazırkı quyu “Heydər Əliyev” yarımdalma qazma qurğusunun qazdığı ilk quyudur.(ONA)

pia.az