İran İsrailə hücuma hazırlaşır, ABŞ qorxur: Nələr ola bilər?..

Poliqon xəbət verir ki, "Axios" portalı bu barədə adı açıqlanmayan üç ABŞ rəsmisinə istinadən yazıb.

Məlumata görə, İranın istənilən cavab tədbirinin onların aprelin 13-də İsrailə hücumu ilə eyni modelə əməl edəcəyi gözlənilir, lakin potensial olaraq daha geniş miqyasda baş verəcək. Hizbullah bu əməliyyata qoşula bilər. Livan qrupunun lideri Həsən Nəsrullah da Haniyənin məhv edilməsi əməliyyatına görə qisas olacağını vəd edib.

Nəşr qeyd edir ki, Bayden administrasiyası yaranmış vəziyyətdən narahatdır. Ağ Ev qorxur ki, İsraili İranın əvvəlki hücumundan müdafiə edən ölkələrin eyni beynəlxalq və regional koalisiyasını səfərbər etmək daha çətin ola bilər. Haniyənin öldürülməsi İsrail və HƏMAS arasındakı müharibə kontekstində baş verib və bu müharibə bütün regionda güclü anti-İsrail əhval-ruhiyyəsinə səbəb olub.

Apreldəki hücum İsrailin Dəməşqdə İran obyektinə endirdiyi və yüksək rütbəli iranlı generalın ölümünə səbəb olan hava hücumuna cavab olaraq həyata keçirilib. İordaniya və Səudiyyə Ərəbistanı da daxil olmaqla bir sıra ərəb ölkələri ya İran və Husilərə məxsus pilotsuz təyyarələrin vurulmasına kömək edib, ya da ABŞ və İsrailə təhdidlərin qarşısını almaq üçün öz hava məkanından istifadə etməyə icazə verib.

Çərşənbə günü ABŞ kəşfiyyatı İranın Haniyənin qisasını alacağına dair aydın siqnallar alıb. Digər iki ABŞ rəsmisi bildirib ki, iranlıların və onların etibarlı şəxslərinin koordinasiya və İsrailə hücum hazırlaması bir neçə gün çəkə bilər.

Başqa bir ABŞ rəsmisi Pentaqon və ABŞ Mərkəzi Komandanlığının aprel hücumu ərəfəsində apardıqları hazırlıqlara bənzər hazırlıqlar apardıqlarını detib. Buraya Amerikanın Fars körfəzi, Şərqi Aralıq dənizi və Qırmızı dənizdəki hərbi aktivləri daxildir.

"Bizi bir neçə çətin gün gözləyir", deyə rəsmi bildirib.

İsrail kəşfiyyatı bunun əvəzində İrandan İsrailə geniş miqyaslı raket hücumu həyata keçirəcəyini gözləyir. İsrail Müdafiə Qüvvələrinin sözçüsü Daniel Haqari cümə axşamı keçirdiyi mətbuat konfransında bildirib ki, İsrailin beynəlxalq tərəfdaşları mümkün hücumun qarşısını almaq üçün bölgədəki qüvvələrini artırıblar.

Bölgədəki gərginlik fonunda Birləşmiş Ştatların və beynəlxalq hava yolları, o cümlədən "United", "Delta", "Lufthansa" və "Swiss" İsrailə uçuşları dayandırdıqlarını açıqlayıb.

Qeyd edək ki, Fələstinin HƏMAS qruplaşmasının siyasi lideri İsmayıl Haniyə iyulun 31-də Tehrandakı iqamətgahında öldürülüb. Səudiyyə Ərəbistanının Al Hadath nəşrinin məlumatına görə, Haniyınin şəxsi iqamətgahı idarə olunan raketlə vurulub. The New York Times qəzeti isə yazıb ki, onun olduğu evə bomba yerləşdirilib və uzaqdan idarə olunub.

Poliqon.info