Zelenski: Radiasiya fəlakətinin qarşısını almaq üçün dünya Rusiyaya təzyiq göstərməlidir

Poliqon xəbər verir ki, bu barədə dövlət başçısı Çernobıl AES-də baş vermiş fəlakətin 38-ci ildönümü münasibətilə "Telegram"da yazıb.

"Radiasiya sərhədləri tanımır və dövlət bayraqları arasında fərq qoymur. Çernobıl faciəsi dünyaya ölümcül təhlükələrin nə qədər tez yarana biləcəyini göstərdi. On minlərlə insan öz sağlamlığı və həyatı bahasına Çernobıl fəlakətinin böyüməsini dayandırdı və onu aradan qaldırdı. Bu faciə 1986-cı ildə və illər sonra dəhşətli nəticələrə səbəb oldu", deyə prezident bildirib.

Eyni zamanda, Zelenski iki il əvvəl Çernobıl Atom Elektrik Stansiyasının 35 gün ərzində Rusiyanın işğalı altında olduğunu xatırladıb:

"Rusiya əsgərləri laboratoriyaları ələ keçirdilər, mühafizəçiləri əsir götürdülər və işçi heyətinə qarşı sui-istifadə edərək, onlardan növbəti hərbi əməliyyatlara başlamaq üçün istifadə etdilər".

Eyni zamanda prezident əlavə edib ki, Avropada ən böyük olan Zaporojya AES 785 gündür rusların girovluğundadır:

"Və bütün dünyanın vəzifəsi Rusiyaya təzyiq etməkdir ki, AES azad edilsin və Ukraynanın tam nəzarətinə qaytarılsın və Ukraynadakı bütün nüvə obyektləri Rusiyanın zərbələrindən qorunsun".

Dövlət başçısının sözlərinə görə, yalnız bu, dünyanın yeni radiasiya fəlakətləri ilə üzləşməyəcəyinə zəmanət verəcək.

"Biz 1986-cı ildə insanların həyatını xilas etmiş insanların gücünü və fədakarlığını xatırlayırıq. Biz indi insanların həyatının qorunmasına kömək edən hər kəsə təşəkkür edirik", deyə dövlət başçısı qeyd edib.

Poliqon.info