Pezeşkian verdiyi vədlərini yerinə yetirə biləcəkmi?

Politoloq: “Biz İranın hansı bölgələrindən Pezeşkiana səs verildiyini nəzərdən keçirsək, deyə bilərik ki, daha çox etnik, milli tərkibli bölgələr Pezeşkiana etimad göstərdi”.

“İran dövlətində hər şey Ali Dini Liderin siyasi göstərişlərinə tabedir. İranın Ali Dini Lideri hansı geosiyasi vektor üzərində dövlətin xarici siyasətini quracaqsa, ona uyğun da addımlar atılacaq”.

Bu sözləri politoloq İlyas Hüseynov İranın yeni prezidentinin seçki öncəsi verdiyi vədləri Poliqon-a şərh edərkən qeyd edib.

İranın yeni prezidenti Məsud Pezeşkian seçki kampaniyası zamanı bir sıra gurultulu vədlər verib. Onların arasında hicabın sərbəst olması, milli azlıqlara öz dillərində məktəblərin açılmaı da var. Eyni zamanda, Pezeşkian azərbaycanlıların üzləşdiyi problemlərdən danışıb, Tehranın Azərbaycan və Türkiyə xarici siyasətinin dəyişdirilməsi vacibliyini vurğulayıb.

Bəs, Pezeşkian bu vədlərini yerinə yetirə biləcəkmi?

İranın bundan sonrakı siyasətini Poliqon-un əməkdaşı Sosial Tədqiqatlar Mərkəzinin (STM) sektor müdiri, politoloq İlyas Hüseynov ilə müzakirə edib.

İlyas Hüseynov: “Ümid edirəm ki, yeni dövrdə Bakı və Tehran arasında münasibətlər öz strateji əhəmiyyəti ilə seçiləcək”.

Yeni dövrdə Türkiyə və Azərbaycan ilə İranın münasibətlərinin daha da yaxşılaşacağına ümidli olan politoloq Poliqon-a açıqlamasında qeyd edib ki, bunun üçün qarşlıqlı imkanlar var:

“İranda növbədənkənar prezident seçkiləri azərbaycanlı Məsud Pezeşkianın qələbəsi ilə başa çatdı. Pezeşkianın seçki dövründə verdiyi vədlər elektrata təsir etdi və nəticədə Pezeşkian İran prezidenti seçildi.

Şübhəsiz ki, biz İranın hansı bölgələrindən Pezeşkiana səs verildiyini nəzərdən keçirsək, deyə bilərik ki, daha çox etnik, milli tərkibli bölgələr Pezeşkiana etimad göstərdi. Bu, onun Azərbaycan və kürd dillərində danışması ilə bağlıdırr. Eyni zamanda, Pezeşkian fars dilini də yaxşı bilir və müxtəlif vəzifələrdə çalışıb.

Lakin İran dövlətində hər şey Ali Dini Liderin siyasi göstərişlərinə tabedir. İranın Ali Dini Lideri hansı geosiyasi vektor üzərində dövlətin xarici siyasətini quracaqsa, ona uyğun da addımlar atılacaq. Amma arzularımız bundan ibarətdir ki, yeni dövrdə Türkiyə və Azərbaycan ilə İranın münasibətləri daha da yaxşılaşacaq. Buna inam var.

İlyas Hüseynov: “Mən inanmıram ki, Peşeçkian fars şovinizminin yaratdığı bu maneəni aşa bilsin. Ola bilsin ki, bir neçə etnik təhsil ocağı açılsın. Lakin bunun kütləvi olacağı az inandırıcıdır”.

Onu da qeyd edim ki, cənab Prezident İlham Əliyev də İranın yeni prezidentinə təbrik məktubu ünvanlayıb. Əldə olunan mühüm razılaşmaların davam etdirilməsi arzuolunandır. Ümid edirəm ki, yeni dövrdə Bakı və Tehran arasında münasibətlər öz strateji əhəmiyyəti ilə seçiləcək.

Etnik dillərdə məktəblərə gəlincə, bu tələb İranın konstitutsiyasında yer alıb. Lakin bilirik ki, fars kimliyinin İran kimliyi ilə eyniləşdirilməsi bu ölkədə etniklərin öz dillərində təhsil almalarına əsas maneə olaraq görünür. Mən inanmıram ki, Peşeçkian fars şovinizminin yaratdığı bu maneəni aşa bilsin. Ola bilsin ki, bir neçə etnik təhsil ocağı açılsın. Lakin bunun kütləvi olacağı az inandırıcıdır”.

Nərminə UMUDLU
Poliqon.info