Podolyak: Ukraynanı qorumaq üçün 10-12 "Patriot" sisteminə ehtiyacımız var

APA xəbər verir ki, bu barədə Ukrayna Prezident Ofisinin rəhbərinin müşaviri Mixaylo Podolyak “The Guardian“a müsahibəsində bildirib.

"Rusiyanın taktikası aydındır: onlar bizim hava hücumundan müdafiə sistemlərimizi alt-üst etmək üçün kütləvi dron hücumlarından istifadə edirlər, sonra isə paralel olaraq infrastrukturumuza hücum etmək üçün ballistik raketlərdən istifadə etmək imkanına malikdirlər. Bizdə Rusiyanın "Oniks" və "Dagger" kimi yeni nəsil raketlərini vurmaq üçün "Patriot" kimi müasir zenit sistemləri çatışmır. Bu sistemlərin çatışmazlığı səbəbindən biz ölkənin bütün ərazilərini qoruya bilmirik", o deyib.

Podolyakın sözlərinə görə, Ukraynaya bütün ölkəni qoruya bilməsi üçün 10-12 "Patriot" və ya buna bənzər sistem lazımdır.
O, əlavə edib ki, Odessaya son zərbələr hava hücumundan müdafiə sistemlərinin gücləndirilməsinin həm iqtisadi, həm də mənəvi baxımdan düzgün addım olduğunu göstərib.

"Bütün bunları daha sonra bərpa etmək Cənubu qorumaq üçün "Patriot" sistemini təmin etməkdən daha bahalı olacaq", - Podolyak qeyd edib.

"Biz başa düşürük ki, əgər siz müharibədən uzaqsınızsa və seçiciləriniz daxili qiymətlərin daha vacib olduğunu deyirsə, o zaman müharibə haqqında düşünmək çətindir... Amma siz sadəcə olaraq bir kağız parçası götürüb hansının daha ucuz olduğunu müəyyən edə bilərsiniz: Ukraynaya qalib gəlməyə kömək etmək yoxsa müharibənin gələcək illər üçün gətirəcəyi bütün risklər və qeyri-sabitlik ilə dondurulmuş münaqişə? Biz bunu tərəfdaşlarımıza izah edirik, lakin qərar qəbuletmə sürəti istədiyimiz qədər yüksək deyil. Mən hesab edirəm ki, mərkəz olmalıdır, müttəfiqlərin hər an nəyin lazım olduğuna qərar verə biləcəyi və çatdırılma cədvəllərini koordinasiyalı şəkildə təyin edə biləcəyi mərkəz", Podolyak əlavə edib.

Poliqon.info