Banqladeşdə nümayişçilərin polislə hökumətyönlü fəallarla toqquşması nəticəsində azı 91 nəfər ölüb, yüzlərlə insan yaralanıb...
Poliqon CNN telekanalına istinadən xəbər verir ki, polis baş nazir Şeyx Hasinanın istefasını tələb edən on minlərlə etirazçını dağıtmaq üçün gözyaşardıcı qaz və rezin güllələrdən istifadə edib.
Hökumət 18:00-dan etibarən ümummilli komendant saatı və avqustun 5-dən etibarən üç günlük tətil elan edib. Bu tədbirlər keçən ay etirazlar başlayandan bəri ilk dəfə həyata keçirilib.
İnternet xidmətlərinin kəsilməsindən sonra vəziyyət daha da pisləşib. İğtişaşlar Hasinanın əsas müxalifət Banqladeş Millətçi Partiyası tərəfindən boykot edilən seçki qələbəsindən sonra etirazların başladığı yanvar ayından bəri ən böyük problemidir.
Hasinanın tənqidçiləri və hüquq qrupları hökuməti etirazları yatırmaq üçün həddən artıq gücdən istifadə etməkdə ittiham edir, rəsmilər isə bunu təkzib edir. Nümayişçilər əsas magistral yolları bağlayıb, tələbələr isə hökumətin istefasını tələb edərək küçələrə çıxıblar.
Şeyx Hasina Milli Təhlükəsizlik Şurasının iclasından sonra bildirib ki, etirazçılar tələbələr deyil, ölkədə sabitliyi pozan terrorçulardır. O, vətəndaşları bu terrorçuları “möhkəm əl”lə yatırmağa çağırıb.
Toqquşmalar bütün ölkəyə yayılıb, polis bölmələri və hakim partiyanın ofislərinə hücum edilib. Şimal-qərb Siracganc rayonunda 12 polis döyülərək öldürülüb. Paytaxt Dəkkədə toqquşmalarda 5 nəfər ölüb, onlarla insan yaralanıb.
Etirazçılar ticarət mərkəzini və avtobusları yandırıblar, mərkəzi Munsiganc rayonunda baş verən qarşıdurmalarda iki inşaat işçisi ölüb, 30 nəfər yaralanıb. Pabna rayonunda 3 nəfər ölüb, 50 nəfər yaralanıb. Boqura rayonunda 3 nəfər, digər 12 rayonda isə daha 30 nəfər ölüb.
Poliqon.info