Həsən Ruhanini kim və niyə təhdid edir?

Xəbərdə qeyd olunur ki, plakatda sözügedən “hovuz” kəlməsinin sui-qəsdə işarə edirmiş. Çünki bir il əvvəl dünyasını dəyişmiş İranın keçmiş prezidenti Əliəkbər Haşimi-Rəfsəncaninin 2017-ci ilin yanvarında hovuzda ölüb.

Qeyd edək ki, əslində hadisə ötən ayın ortalarında Qumda bir toplantıda qeydə alınıb. Qumda məşhur “Feyziyyə” mədrəsəsində baş verib. Mədrəsədə keçirilən tədbirlərin birində ruhanilər tərəfindən 5 plakat qaldırılıb. Plakatların 4-də hökumət tənqid olunub, birində isə qeyd olunan təhdid cümlələri yer alıb. Plakatda “Ey müzakirələri şüar edən! Fərah hovuzu səni gözləyir” yazısı olub. Sözügedən Fərah hovuzu isə Rəfsəncaninin öldüyü yerdir. 2017-ci ildə Tehranın zənginlər yaşayan şimal hissəsində Fərah adlı hovuzda dincələrkən eks-prezident Rəfsəncani ürək çatışmazlığından dünyasını dəyişib. Əvvəlcə onun xəstəxanada öldüyü xəbərləri yayılsa da, sonradan orduya yaxın siyasətçilərdən biri eks-prezidentin hovuzda dünyasını dəyişdiyini yazıb.

Sözügedən toplantıdakı 5 plakatı qaldıranların hamısı polisə aparılıb, ancaq onların ifadələri alındıqdan sonra azad ediblər. Çünki İranda bir qayda olaraq hələ qədim zamanlardan ruhanilərin xüsusi imtiyazları var, onları xüsusi ruhanilər məhkəməsi mühakimə edir. Hətta siyasi motivli cinayətlər olsa belə, hökmü dövlət məhkəməsi deyil, Qumda fəaliyyət göstərən ruhanilər məhkəməsi verir. Bu mənada ruhanilər daha müstəqil və sərbəstdirlər.

Ancaq Həsən Ruhaninin məhz nüvə müzakirələri aparmasına işarə edərək Rəfsəncaninin aqibəti ilə hədələnməsi daha çox diqqət çəkir. İlk baxışdan bu hadisənin mühafizəkar qanadın sifariş etdiyi bir təhdid olduğu görüntüsü yaransa da, mühafizəkar qanadın prezidentə qarşı bu şəkildə bir ruhaninin dili ilə açıq təhdid göndərməsi inandırıcı deyil. Hətta bəzi mühafizəkar media bu hadisənin prezident ətrafı tərəfindən təşkil olunduğunu, məqsədin prezident Həsən Ruhaniyə qarşı ciddi təzyiq və təhdidlərin olduğunu nümayiş etdirmək məqsədi güddüyünü yazıb. Hər halda aydın məsələdir ki, son aylarda İranda ABŞ-ın təzyiqi ilə embarqoların kəskinləşməsi, inflyasiyanın sürətlənməsi bütün kəsimlərdə narazılığı daha da artırıb. Mümkündür ki, bu hadisə mühafizəkar ruhanilər arasında prezidentə qarşı hədsiz qəzəbin ifadəsi olub.

Ancaq plakatda məhz müəmmalı ölüm hadisəsinə işarə edilməsi də maraqlıdır. Həsən Ruhani “islahat” qanadına məxsus siyasətçidir. Bu qanadın əsas liderlərindən biri isə Haşimi Rəfsəncani olub. Ruhanini təhdid edən plakatda məhz Rəfsəncaninin müəmmalı ölümünün xatırlanması prezidentə üstüörtülü mesaj kimi görünür.

Marqlıdır ki, xarici mediaya bu xəbər təxminən bir ay sonra servis olunub. Baxmayaraq ki, yerli media artıq bu mövzunu necə deyərlər unudub. Lakin istənilən halda, Qumda Həsən Ruhaniyə qarşı plakat qaldırılması ölkənin ideoloji mərkəzi olan, dini-təhsil mərkəzi olan, böyük ayətullahların yaşadığı Qumda prezidentə qarşı müxalif şüarların yayılması ölkə içərisindəki narazılığın ən həssas “nöqtələrə” qədər gedib çıxdığını göstərir.(musavat.com)

pia.az