Azərbaycanda süni ət satılacaq?

Nazirlikdən Azərbaycan bazarında süni ətin görünməsi ehtimalına münasibət bildirilib.

AzNews.az xəbər verir ki, Kənd Təsərrüfatı Nazirliyi və Ərzaq və Dərmanlara Nəzarət Administrasiyası kultivasiya edilmiş hüceyrələrdən qida məhsullarının hazırlanmasının birgə tənzimlənməsi ilə bağlı razılığa gəliblər.

Eyni zamanda, Azərbaycan Kənd Təsərrüfatı Nazirliyinin iqtisadçısı, ət məhsulları üzrə mütəxəssis Müzəffər Abbasovun sözlərinə görə, bütün hazırlanma normalarına riayət edilməklə ortaya çıxan süni ətin Azərbaycana gətirilməsi qadağan edilmiş, geni dəyişdirilmiş məhsullara aidiyyəti yoxdur.

“Laboratoriya şəraitində hazırlanmış ətin GMO ilə heç bir ümumi cəhəti yoxdur. Doğrudur, süni ətin hazırlanmasında bütün standartlara riayət edilməlidir. Əgər hazırlanma prosesində gen dəyişdirilməsi olubsa və ya kanserogen preparatlar istifadə edilibsə, əlbəttə ki, biz bu məhsulları qəbul edə bilmərik”, - M.Abbasov qeyd edib.

Onun sözlərinə görə, əslində, süni ətdə pis heç nə yoxdur. Başlıcası, istehlakçıların aldadılmamasıdır. Misal üçün, Türkiyədə qırmızı ət əvəzinə süni rənglənmiş toyuq əti satılır. Yəni satılan məhsulla bağlı kifayət qədər məlumat göstərilməlidir.

“Əgər Azərbaycana süni ət idxal edilsə, ilk növbədə, onun insan sağlamlığı üçün zərərli olub-olmadığı yoxlanılacaq. Əgər süni ət bütün lazımi normalara cavab versə, biz onun mağazalara çatdırılmasında heç bir problem görmürük”, - M.Abbasov bildirib.

Azad İstehlakçılar İctimai Birliyinin sədri Eyyub Hüseynov ölkədə süni ət satışına qarşı çıxıb:

“Biz, istehlakçılar özümüz özümüzü aldadırıq, düşünürük ki, bizim qeydimizə qalacaqlar. Biznesin əsas məqsədi istehlakçıdan mümkün qədər çox pul qoparmaqdır”, - E.Hüseynov qeyd edib.

Maraqlıdır ki, süni ət təbii mənşəli olan məhsullardan xeyli faydalı ola bilər. EWG təşkilatının məlumatına əsasən, təkcə ABŞ-da istehsal olunan antibiotiklərin 70 faizi heyvanların saxlanılması üçün istifadə edilir. Bu antibiotikin böyük hissəsi qidalanma ilə bizim bədənimizə daxil olur. Süni ət isə bu cür qatqılardan kənarda qalır.

pia.az