Türkiyə ilə Misir arasında diplomatik münasibətlər 10 ildən sonra tam bərpa olunub...
Poliqon TASS Agentliyinə istinadən xəbər verir ki, Türkiyə Xarici İşlər Nazirliyi Ankara ilə Qahirə arasında 10 ildən sonra diplomatik münasibətlərin tam bərpa olunduğunu, iki ölkənin qarşılıqlı əlaqələrinin səfirlər səviyyəsinə çatdırıldığını bildirib.
“Türkiyə Qahirədə fövqəladə və səlahiyyətli səfir vəzifəsinə səfir Salih Mutlu Şenin namizədliyini irəli sürüb”, deyə nazirliyin iyulun 4-də verdiyi məlumatda deyilir.
Misir Xarici İşlər Nazirliyi Türkiyə ilə diplomatik əlaqələrin artırılması ilə bağlı məlumatı təsdiqləyib. Qahirə Əmr əl-Hamamini Ankaraya səfir təyin edir. Qeyd olunur ki, belə bir addım iki dövlət arasında diplomatik münasibətləri bərpa etməyə yönəlib və həmçinin Misir və türk xalqlarının rifahı naminə ikitərəfli əməkdaşlığı gücləndirmək üçün çalışmaqda onların ümumi əzmini əks etdirir.
Qeyd edək ki, Türkiyə ilə Misirin diplomatik əlaqələrin səviyyəsinin artırılması və səfir mübadiləsi barədə razılığa gəldiyi mayın sonunda bildirilmişdi.
Xatırladaq ki, Türkiyə ilə Misir arasında münasibətlər 2013-cü ildə Misir prezidenti Məhəmməd Mursinin devrilməsi ilə pisləşib. Türkiyə prezidenti daha sonra Misir hərbçilərinin devrilmiş prezidentin tərəfdarlarına qarşı hərəkətlərini pisləyib. Bundan sonra ölkələr məsləhətləşmələr üçün əvvəlcə öz səfirlərini geri çağırıb, daha sonra bir-birlərinin səfirlərini persona non-qrata elan ediblər.
Poliqon.info