Hazırda İsraillə İran arasında danışıqlar mümkün deyil...
Poliqon xəbər verir ki, bu barədə İsrailin Rusiyadakı səfiri Simone Halperin "İzvestiya" qəzetinə müsahibəsində bildirib.
"İsraili məhv etmək məqsədi daşıyan rejimlə danışıqlar yoxdur və ola da bilməz. İran İsraili yer üzündən silmək niyyətini açıq şəkildə bəyan etməklə yanaşı, bu istiqamətdə fəal iş aparır. Bu, həm birbaşa, həm apreldə İranın pilotsuz təyyarəsi və İsrailə raket hücumu, həm də dolayı yolla, etibarlı şəxslər vasitəsilə, yəni HƏMAS, Hizbullah və Husi yaraqlılarını silahlandırmaq və onlara sponsorluq etməklə baş verir. Bu hərəkətlərin dəhşətli nəticələrini hamımız görürük. 30 il əvvəl Bunos-Ayresdə törədilən terror aktından başlayaraq (1994-cü il iyulun 18-də Argentina Yəhudi Mədəniyyət Mərkəzinin binası yaxınlığında kamikadze bombanı partladıb, 85 nəfər həlak olub) bu günə kimi yəhudilərə qarşı qanlı hücumlar hər yerdə davam edir", deyə səfir bildirib.
Üstəlik, yəhudi dövləti yaxın vaxtlarda yeni prezidentin andiçmə mərasiminin keçiriləcəyi İrana qarşı koalisiya yaratmaq niyyətindədir. Baş nazir Benyamin Netanyahu ABŞ Konqresi qarşısında çıxış edərkən NATO kimi İran təhlükəsinə qarşı hərbi ittifaq yaratmağı təklif edib. Ekspertlərin fikrincə, ölkənin yeni rəhbəri İslam Respublikasının xarici siyasətini yumşalda bilər, çünki Tehran genişmiqyaslı müharibədə maraqlı deyil.
"Eyni şəkildə, Amerika və İsrail bu gün İrandan gələn təhdidlərə qarşı çıxmaq üçün Yaxın Şərqdə təhlükəsizlik ittifaqı yarada bilər", deyə siyasətçi izah edib. Netanyahu əlavə edib ki, bölgədə İsraillə münasibətləri normallaşdıran istənilən ölkə əvvəllər İbrahim Alyansı olaraq təyin etdiyi bu koalisiyaya qoşulmağa dəvət edilməlidir. Baş nazirin sözlərinə görə, belə bir ittifaq İsrail və ərəb dövlətləri arasında münasibətləri normallaşdırmaq üçün bir sıra sazişlərin, İbrahim razılaşmalarının davamı ola bilər. 2020-ci ildə İsraillə belə sazişləri Birləşmiş Ərəb Əmirlikləri, bir qədər sonra isə Bəhreyn və Mərakeş bağlayıb və imzalanmada Donald Tramp vasitəçi olub.
Poliqon.info