İran prezidenti Məsud Pezeşkian Rusiya Milli Təhlükəsizlik Şurasının katibi Sergey Şoyqu ilə görüşündə Rusiya Federasiyası ilə strateji tərəfdaş kimi əlaqələrin inkişaf etdirilməsini İranın xarici siyasət prioritetlərindən biri hesab edib...
Poliqon xəbər verir ki, bu barədə “Mehr” xəbər agentliyi məlumat yayıb.
İran prezidenti görüşdə iki ölkə arasında əldə olunan razılaşmaların həyata keçirilməsinin sürətləndirilməsinin vacibliyini vurğulayıb. Pezeşkian İran və Rusiya arasında regional və beynəlxalq əməkdaşlığın əhəmiyyətinə də toxunub.
“Biz hesab edirik ki, bəzi güclərin, o cümlədən ABŞ-ın dünyada üstünlüyü dövrü başa çatıb. Çoxqütblü dünyanı təşviq etmək üçün İran və Rusiya arasında əməkdaşlıq, şübhəsiz ki, dünyada təhlükəsizliyin və sülhün daha da təşviqinə gətirib çıxaracaq”, deyə İran prezidenti vurğulayıb.
Şoyqi isə bildirib ki, İran Rusiyanın regionda əsas və strateji müttəfiqlərindən biridir.
“İran Rusiyanın regionda əsas və strateji müttəfiqlərindən biridir. İki ölkə çoxqütblü dünya yaratmağa və regionun təhlükəsizliyini təmin etməyə çalışır. İki ölkə arasında əlaqələr bütün sahələrdə inkişaf edir və yaxşı perspektivlərə malikdir”, deyə Şoyqu da öz növbəsində cavab verib.
Poliqon.info