Tehran Məhkəməsi ABŞ-ın İrana 313 milyon dollar təzminat ödəməsinə qərar verib

İranda məhkəmə ABŞ-ın keçmiş prezidentləri Barak Obama və Corc Buş da daxil olmaqla 9 şəxs və qurumu 2017-ci ildə İran parlamenti və Ayətullah Xomeyninin məqbərəsində törədilən terror aktlarında rol oynadıqlarını əsas gətirərək, 312,9 milyon dollar təzminat ödəməyə məhkum edib.

Poliqon xəbər verir ki, Tehran Mülki Məhkəməsində baxılan işdə ABŞ-ın keçmiş prezidentləri Barak Obama və Corc Buş, ABŞ Silahlı Qüvvələrinin istefada olan generalı Tommi Rey Franks, Mərkəzi Kəşfiyyat İdarəsi (MKİ), Mərkəzi Komandanlıq (CENTCOM), Maliyyə Nazirliyi, texnologiya şirkəti "Lockheed Martin" və Amerika Hava Yolları Qrupu da daxil olmaqla 9 şəxs və qurumun İŞİD kimi terror qruplarının təşkilatlanması və idarə olunmasında fundamental rolu olduğu səbəbilə günahkar bilinib.

Qərara əsasən, ABŞ İrana ümumilikdə 312 milyon 950 min dollar məbləğində təzminat ödəməlidir. ABŞ İrana mənəvi ziyana görə 104 milyon dollar, maddi ziyana görə isə 199 milyon dollar məbləğində təzminat ödəməlidir. Sözügedən terror hadisələrində ölənlərin ailə üzvlərinə isə 9 milyon 950 min dollar verməlidir.

Qeyd edək ki, 7 iyun 2017-ci ildə İŞİD tərəfindən İran parlamenti və Ayətullah Xomeyninin məqbərəsində törədilən terror aktı zamanı 12 nəfərin ölüb, 43 nəfər yaralanıb.

Poliqon.info