Banqladeşin ölkədən qaçan baş nairi geri dönəcək

Banqladeşin keçmiş baş naziri Şeyx Hasina başqa ölkələrə sığınmayacaq və müvəqqəti hökumət ölkədə seçkilərin keçirilməsinə qərar verdikdə vətəninə qayıdacaq.

Poliqon xəbər verir ki, bu barədə onun oğlu Sacib Vazed Coy məlumat verib.

Baş nazirin oğlunun sözlərinə görə, anasının siyasi sığınacaq istəmək fikri yoxdur.

“O, hazırda Hindistandadır. Müvəqqəti hökumət ölkədə seçkilər keçirmək qərarına gələn kimi o, Banqladeşə qayıdacaq”, deyə “The Times of India” qəzeti siyasətçinin oğlundan sitat gətirir.

Sacib Vazed Coy həmçinin Hindistanın baş naziri Narendra Modiyə anasının həyatını xilas etdiyinə görə təşəkkür edib.

Xatırladaq ki, avqustun 5-də Şeyx Hasina istefa verib və Banqladeşi tərk edərək Hindistana uçub. “The Free Press Journal”ın Hindistan nəşri xəbər verir ki, keçmiş baş nazir Böyük Britaniyadan sığınacaq istəyib, lakin Britaniya rəsmilərinin cavab verməməsi səbəbindən o, Belarus, Qətər, BƏƏ və Səudiyyə Ərəbistanını və Finlandiyaya sığınmaq variantlarını nəzərdən keçirib.

Poliqon.info