Kim Çen In əmindir ki, Putin müharibədə qalib gələcək

Poliqon xəbər verir ki, Şimali Koreya lideri Kim Çen In Rusiya prezidenti Vladimir Putinə məktub göndərərək Koreyanın azad edilməsinin 79-cu ildönümü münasibətilə təbrikinə görə təşəkkür edib. Kim Çen In hesab edir ki, Rusiya regionda sülhə nail olmaq üçün “müqəddəs müharibədə” qalib gələcək.

Şimali Koreya lideri bildirib ki, koreyalılar onlarla birlikdə Koreyanın azadlığı uğrunda vuruşan və bu yolda həlak olmuş sovet əsgərlərinin şücaətlərini ehtiramla xatırlayır. Kimin sözlərinə görə, iki ölkənin orduları və xalqları arasında ümumi düşmənə qarşı mübarizə zamanı möhkəmlənən dostluq bu gün yeni, çoxqütblü dünyanın yaradılması üçün güclü hərəkətverici qüvvə rolunu oynayır.

“Fürsətdən istifadə edərək, qəti əminliyimi bildirirəm ki, Sizin enerjili rəhbərliyiniz altında qüdrətli rus xalqı ölkənin suveren hüquqlarını və təhlükəsizlik maraqlarını əzmlə müdafiə edəcək, regional sülhün və beynəlxalq ədalətin bərqərar olması üçün müqəddəs müharibədə qələbəyə nail olacaq”, deyə Koreya Mərkəzi Teleqraf Agentliyinin yaydığı məktubda bildirilir.

Xatırladaq ki, iyun ayında Putin Şimali Koreyaya səfər edib və orada Kim Çen Inla görüşüb. İki ölkə liderləri strateji tərəfdaşlıq sazişi imzalayıblar. Bu sənəd tərəflərdən birinə hücum zamanı hərbi yardımın göstərilməsini nəzərdə tutur.

Poliqon.info