Makron seçkidə uduzarsa, Parisin Cənubi Qafqaz siyasətində dəyişiklik ola bilər?

Politoloq: “Emmanuel Makronun partiyasının parlament seçkilərində uduzması indiki məqamda real görünmür”.

“Əks proses olsa belə, yəni Makronun partiyası seçkini uduzsa belə, inanmıram Fransanın Cənubi Qafqaz siyasətində dəyişiklik olsun”.

Bu sözləri politoloq Turan Rzayev Fransada keçiriləcək parlament seçkilərini Poliqon-a şərh edərkən qeyd edib.

Fransada parlament seçkilərinin birinci turunu keçirilməsinə bir həftədən də az vaxt qalıb. Makronun partiyası bu seçkilərdə uduzarsa, Parisin Cənubi Qafqaz siyasətində hansısa dəyişikliklər gözləniləndirmi?

Fransanın Cənubi Qafqaz siyasətini Poliqon-un əməkdaşı politoloq Turan Rzayev ilə müzakirə edib.

Turan Rzayev: “Makron atdığı addımlara görə hakimiyyətdədir. Yəni o bu addımları atsın deyə, onu hakimiyyətə gətiriblər”.

Hakimiyyətə gələcək yeni partiya belə, mövcud hakimiyyətin ideologiyasına bənzər xətt aparacağını vurğulayan politoloq Poliqon-a açıqlamasında əlavə edib ki, bu da öz növbəsində xarici siyasətə də təsir edəcək:

“Emmanuel Makronun partiyasının parlament seçkilərində uduzması indiki məqamda real görünmür. Çünki Makron hər nə qədər yalnış siyasət yeritsə də, daxili auditoriyada kifayət qədər dəstəkçiləri var. Doğrudur, Fransa prezidenti daha çox aşağı təbəqə istiqamətində yalnış siyasi xətt yeritsə də, ultra-millətçi və sağ siyasət yeritməsi, islamofobiya, miqrant məsələləri ilə bağlı çıxışları hesab edirəm ki, onun partiyasının qələbə qazanmasına gətirib çıxaracaq. Amma bu qələbə əvvəlki illərdəki kimi böyük fərqlə yox, nisbətən səslərin azalması ilə müşahidə olunacaq.

Əks proses olsa belə, yəni Makronun partiyası seçilməsə belə, inanmıram Fransanın Cənubi Qafqaz siyasətində dəyişiklik olsun. Yəni hakimiyyətə gələcək yeni partiya belə, mövcud hakimiyyətin ideologiyasına bənzər xətt aparacaq. Bu da öz növbəsində xarici siyasətə də təsir edəcək.

Onu da qeyd edim ki, Makron atdığı addımlara görə hakimiyyətdədir. Yəni o bu addımları atsın deyə onu hakimiyyətə gətirdilər. Buna görə də, nəticə etibarilə mən seçkilərin nəticəsinin dəyişəcəyini düşünmürəm. Amma belə bir hadisə baş verərsə belə, bu Cənubi Qafqazda elə də ciddi dəyişikliklərə səbəb olmayacaq”.

Nərminə UMUDLU
Poliqon.info