İstiqlal muzeyində 28 may-Müstəqillik gününə həsr olunan tədbir-sərgi keçirilib

Tədbirdə Azərbaycan Xalq Cümhuriyyəti dönəmindəki rəsmi dövlət qəzeti “Azərbaycan” qəzetinin rus dilində nəşrinin redaktoru olmuş, görkəmli jurnalist, tənqidçi, tərcüməçi və teatrşünas Xəlil İbrahimdən bəhs edən və onun yazılarının toplandığı “İstiqlal yazıları” kitabının təqdimat mərasimi və nəvəsi Lalə Nəcəfovanın Azərbaycan İstiqlal muzeyinə təhvil verdiyi 44 ədəd foto və sənədlər ibarət sərgi təşkil edilib.

Azərbaycan jurnalistikasının əsasını qoyanlardan olan görkəmli publisist-jurnalist Xəlil İbrahimdən bəhs olunan “İstiqlal yazıları” kitabı müxtəlif illərdə yayılmış məqalələrin toplusudur. Qeyd edək ki, əməkdar jurnalist Akif Aşırlının redaktoru olduğu "İstiqlal yazıları" adlı kitabda tərcümələrin hazırlanmasında Azərbaycan qəzetini transliterasiya edən filoloq Azad Ağaoğlu iştirak edib.
Sonda tədbir iştirakçıları Xəlil İbrahimə məxsus fotoşəkil, əlyazma və sənədlərin nümayiş olunduğu sərgi ilə tanış olublar.

Tədbirdə Bakı Dövlət Universitetinin, Azərbaycan Dövlət Pedaqoji Universitetinin tələbələri, "Böyük Qayıdış" Gənclər Təşkilatı İctimai Birliyinin üzvləri və digər qonaqlar iştirak ediblər.

Poliqon.info