İranın sabiq nazir müavini casusluq ittihamı ilə edam ediləcək

PİA.az Mizan Xəbər Agentliyinə istinadən məlumat verir ki, keçmiş müdafiə naziri müavini Əkbəri bir müddət əvvəl İngiltərə adına casusluq etdiyi üçün həbs edilib. Bu prosesdə “casusluq” ittihamı ilə məhkəməyə çıxarılan Əkbəri edam cəzasına məhkum edilib. Təqsirləndirilən şəxs qərara etiraz etdikdən sonra kassasiya məhkəməsində işə yenidən baxılıb və Ali Məhkəmə etirazı rədd edərək Əkbəri haqqında edam hökmünü qüvvədə saxlayıb.

Digər tərəfdən, Kəşfiyyat Nazirliyi Əkbərinin ölkənin həssas və strateji mərkəzlərinin məlumatlarını İngiltərənin “MI6” adı ilə tanınan Gizli Kəşfiyyat Xidmətinə (SIS) ötürdüyünü açıqlayıb.

Bəyanatda Əkbəri İranın strateji qurumları haqqında mühüm məlumatlar toplayan və topladığı məlumatları tam şəkildə dəfələrlə Britaniya kəşfiyyatına təqdim edən Gizli Kəşfiyyat Xidmətinin ən mühüm casuslarından biri olaraq xarakterizə edilib.

İkili İran-İngiltərə vətəndaşlığına sahib olduğu deyilən Əkbərinin nə vaxt həbs olunduğu barədə məlumat olmasa da, ölkə mətbuatında onun 2019-2020-ci illər arasında “Mİ6” adına casusluq ittihamı ilə həbs edildiyi barədə məlumat verilib.

pia.az