Fənərbaxçanın keçmiş baş məşqçisi vəfat edib

PİA.az Türkiyə KİV-lərinə istinadən xəbər verir ki, Türkiyə Futbol Federasiyasının “Twitter” hesabında yer alan paylaşımda deyilir:

“A Milli komandamızın keçmiş məşqçilərindən Kalman Meszöli 81 yaşında vəfat edib. Türkiyə Futbol Federasiyası olaraq, dərindən kədərləndiyimizi bildirir, Meszölinin vəfatı ilə əlaqədar ailəsinə, yaxınlarına və Macarıstan futbol ictimaiyyətinə başsağlığı veririk”.

Kalman Meszöli kimdir?

Macarıstanlı məşqçi 1985-ci ildə 4 ay Türkiyə Milli komandasında çalışıb, 1986-cı il Dünya Çempionatının seçmə mərhələsində Şimali İrlandiya və İsveçrə ilə oynanılan matçlarda komandanın başında olub. 1959-1972-ci illər arasındakı peşəkar futbolçuluq dönəmində yalnız ölkəsinin Vasas komandasında oynayan Meszöli bu komanda ilə 1961, 1962 və 1966-cı illərdə 4 çempionat qazanıb. 1962-ci ildə ölkəsində ilin oyunçusu seçilib və Macarıstanın əfsanəvi müdafiəçiləri sırasında yerini tutub.

1985-1986-cı illərdə isə Türkiyənin Fənərbaxça və Altay klublarında da çalışan Meszöli səhhətində yaranan problemlərə görə bir müddətdir xəstəxanada müalicə alırdı.

pia.az