ABŞ prezidenti: Putin azad xalqın iradəsini qırmağa çalışır...

Poliqon xəbər verir ki, ABŞ prezidenti Co Bayden Rusiyanın Poltavaya 50-dən çox insanın ölümü, 200-dən çox insanın yaralanması ilə nəticələnən raket hücumu ilə bağlı açıqlama verib.

“Mən bu dəhşətli hücumu qətiyyətlə pisləyirəm. Bu hücum Putinin azad xalqın iradəsini qırmaq üçün iyrənc cəhdlərini davam etdirməsinin faciəvi xatırlatmasıdır”, deyə Bayden bildirib.

Bayden qeyd edib ki, Birləşmiş Ştatlar Ukrayna ilə yanaşı durmağa və ona hava hücumundan müdafiə sistemləri də daxil olmaqla hərbi yardım göstərməyə davam edəcək.

Qeyd edək ki, çərşənbə axşamı səhər saatlarında Rusiya ordusu Ukrayna Silahlı Qüvvələrinin Poltavadakı təlim mərkəzinə raket zərbəsi endirib, Rabitə İnstitutunun binalarından biri qismən dağıdılıb.

Son məlumatlara görə, 51 nəfər ölüb, 271 nəfər yaralanıb. Zərbə iki ballistik raketlə endirilib.

Ukrayna Quru Qoşunlarının bəyanatında deyilir ki, zərbə nəticəsində onlarla hərbçi həlak olub.

Poliqon.info