İran parlamenti Pezeşkianın təqdim etdiyi yeni hökuməti təsdiq edib...
Samir Hümbətov: “Əslində Pezeşkianın özü islahatçı olsa da, amma nədənsə yeni komandasında mühafizəkarlara da çox yer verilib”.
“Pezeşkianın hansısa dəyişikliyə gedəcəyini düşünmürəm”.
Bu sözləri politoloq Samir Hümbətov İranda Pezeşkianın təqdim etdiyi yeni hökuməti Poliqon-a şərh edərkən qeyd edib.
Dünən İran parlamenti Pezeşkianın təqdim etdiyi yeni hökuməti təsdiq edib. Ümumilikdə, islahatçı Pezeşkianın kabineti mühafizəkar Rəisinin kabinetindən nəylə fərlənir? Bu hökumətin Pezeşkianın vəd etdiyi islahatları həyata keçirə biləcəyinə inam və ümid varmı?
İranda formalaşan yeni hökuməti Poliqon-un əməkdaşı “Beynəlxalq Münasibətlər və Diplomatiya Araşdırmaları Mərkəzi”nin rəhbəri, politoloq Samir Hümbətovla müzakirə edib.
Samir Hümbətov: “Məlum məsələdir ki, Pezeşkianın yeni komandasında olan mühafizəkarlar onun Qərblə əlaqələrinin dərinləşməsinə imkan verməyəcək”.
Pezeşkianın belə komanda ilə iqtisadi açılım etməsinin bir az çətin olacağını düşünən politoloq Poliqon-a açıqlamasında qeyd edib ki, Pezeşkianın əhalinin güzəranı ilə bağlı nəysə edəcəyi inandırıcı görünmür:
“Əslində Pezeşkianın özü islahatçı olsa da, amma nədənsə yeni komandasında mühafizəkarlara da çox yer verilib. Təsadüfi deyil ki, İranın keçmiş xarici işlər naziri Cavad Zərifi özünə vitse-prezident seçmişdi, amma bir gün sonra istefa verdi. Bəzi məlumatlarda Cavad Zərifin istefa verməsinin başında duran səbəb kimi də Pezeşkian hökumətində mühafizəkarların çox olması göstərilirdi. Cavad Zərif qeyd edib ki, mühafizəkarların çoxluq təşkil etdiyi komanda ilə hansısa islahatlara getmək çətin məsələdir.
Görünür ki, Pezeşkian açıq şəkildə Xameneyinin istəyinə uyğun olaraq hökumət formalaşdırıb. Buna görə də, düşünmürəm ki, nəysə dəyişiklik ola bilər. Yəni Pezeşkianın hansısa dəyişikliyə gedəcəyini düşünmürəm.
Samir Hümbətov: “Pezeşkianın yeni komandasının bu məsələdə ümidləri doğruldacağını düşünmürəm”.
İranın iqtisadi xarici siyasət məsələsinə gəlincə isə deyə bilərəm ki, İran iqtisadiyyatını həm proqnoz etmək mümkündür, həm də mümkün deyil. Yəni məlum məsələdir ki, Pezeşkianın yeni komandasında olan mühafizəkarlar onun Qərblə əlaqələrinin dərinləşməsinə imkan verməyəcək.
Eyni zamanda, Pezeşkianın belə komanda ilə iqtisadi açılım etməsi bir az çətin olacaq. Pezeşkianın əhalinin güzəranı ilə bağlı nəysə edəcəyi inandırıcı görsənmir. Bu baxımdan Pezeşkianın yeni komandasının bu məsələdə ümidləri doğruldacağını düşünmürəm. Biz zamanı gözləməliyik. Hər bir halda atılan addımlarla bunu dəqiq biləcəyik”.
Nərminə UMUDLU
Poliqon.info