Amerikanın keçmiş lideri Donald Tramp bütün planet üçün təhlükə yaradır...
Poliqon xəbər verir ki, bunu Massaçusets ştatının Boston şəhərində seçki kampaniyası üçün vəsait toplama tədbirində çıxış edən ABŞ-ın hazırkı prezidenti Co Bayden deyib.
"O, planet üçün təhlükə yaradır. Tramp sadəcə insanlara deyir ki, ona bir milyon dollar versələr, onlara istədikləri hər şeyi verəcək. 2016-cı ildə Trampın bizə heç kimin puluna ehtiyacı olmadığını söyləməsindən xeyli yol qət etmişik. Onun çoxlu pulu var idi. İndi o qədər ümidsizdir ki, İncil və qızıl ayaqqabıları satır", deyə Bayden bildirib.
Martın sonunda, Qriqorian təqviminə görə ABŞ-da qeyd olunan Pasxa bayramı üçün Tramp Amerikada "dini ruhu dirçəltmək" və onu "yenə möhtəşəm etmək" üçün İncilin nüsxələrini 60 dollara satmağa başlayıb. Fevralın ortalarında eks-prezidentin satışa çıxardığı məhdud sayda qızıl idman ayaqqabısı bir neçə saat sonra tükənib. Onun qiyməti 399 dollar olub.
Bayden həmçinin Trampın səhifəsində yayımlanan "vahid Reyx"dən bəhs edən videoya görə Trampı "Hitler dili"ndən istifadə etməkdə ittiham edib.
"Bu, Amerikanın deyil, Hitlerin dilindən istifadə edən eyni adamdır", deyə Bayden bildirib.
Söhbət Trampın "Truth" sosial şəbəkəsində dərc etdiyi videodan gedir. Seçki videosunun fraqmentlərindən birində "Vahid Reyxin yaradılması səbəbindən ABŞ sənaye gücü əhəmiyyətli dərəcədə artdı" deyilir. Bu videonun yayımlanması ABŞ-da qalmaqala səbəb olub. Daha sonra video səhifədən silinib.
Poliqon.info