Fələstinin Baş naziri Məhəmməd Ştaye radikal HƏMAS qrupuna Qəzza zolağı, İordan çayının qərb sahili və Şərqi Qüdsdən ibarət müstəqil Fələstin dövlətinin yaradılmasında iştirak etməsini istəyir...
Poliqon xəbər verir ki, bu barədə Bloomberg Agentliyi məlumat yayıb.
"Oktyabrın 7-nə qədər HƏMAS başqa şey idi, ondan sonra isə başqa... Əgər onlar razılığa gəlməyə və Fələstin Azadlıq Təşkilatının siyasi platformasını qəbul etməyə hazırdırlarsa, o zaman dialoq üçün fürsət var", deyə Baş nazir bildirib.
Məhəmməd Ştaye vurğulayıb ki, fələstinlilər parçalanmamalıdır. Baş nazirin fikrincə, İsrail ordusunun HƏMAS-ı məhv etmək məqsədləri qeyri-realdır, radikal qrupun nümayəndələri gələcək rəhbərlik strukturuna daxil edilməlidir.
Məhəmməd Ştaye həmçinin bildirib ki, Fələstin Administrasiyası ABŞ-la hərbi əməliyyatlar başa çatdıqdan sonra Qəzza zolağının idarə olunması üçün gələcək planı müzakirə edir. Tərəflər İsrailin Fələstin anklavını işğal etməməli, orada bufer zona yaratmamalı və fələstinliləri qovmamalı olduğu mövqeyində razılaşırlar.
"Biz İsrailin hərbi planına əməl etmək fikrində deyilik... Biz beynəlxalq ictimaiyyətlə birlikdə işlədiyimiz mexanizm yaratmalıyıq", deyə baş nazir bildirib.
Poliqon.info