Rusiyanın Sankt-Peterburq şəhərində hazırlığı davam etdirən "Neftçi" yeni baş məşqçi Adrian Mutunun rəhbərliyi altında ilk məşqə çıxıb.
Poliqon.info klubun rəsmi saytına istinadən xəbər verir ki, "Zenit"in təlim-məşq mərkəzində keçirilən hazırlıq prosesində rumıniyalı mütəxəssisin köməkçiləri - Alin-Nikolaye Çita, Aurelian-Boqdan Patraşku, Miodraq Todorov və Mihai-Qavril Nedeban da iştirak ediblər. Məşqdə isinmə hərəkətlərindən sonra əsasən toplu çalışmalar icra olunub.
Qeyd edək ki, "Neftçi" "Match TV" kubokunda sonuncu oyununu Türkiyə "Fənərbağça"sına qarşı keçirəcək. İyulun 15-də "Smena" stadionunda oynanılacaq görüş Bakı vaxtı ilə saat 15:00-da başlayacaq.
Turnir başa çatandan sonra "Neftçi" Rusiyanın paytaxtına yollanaraq Moskva "Spartak"ı ilə yoldaşlıq matçında qüvvəsini sınayacaq. İyulun 18-də "Otkrıtiye Bank Arena"da təşkil olunacaq qarşılaşma Bakı vaxtı ilə saat 22:00-da start götürəcək və "Neftçi TV" vasitəsilə canlı yayımlanacaq. Komanda iyulun 19-da Bakıya qayıdacaq və hazırlığını paytaxtda davam etdirəcək.
Yeni mövsümdə Azərbaycanı UEFA Konfrans Liqasında təmsil edəcək "Neftçi" II təsnifat mərhələsində "Jelezniçar" (Bosniya və Herseqovina) - "Dinamo" (Minsk, Belarus) cütünün qalibi ilə qarşılaşacaq. İlk oyun iyulun 27-də səfərdə, cavab matçı isə avqustun 3-də "Bakcell Arena"da keçiriləcək.
Poliqon.info