Moskva Rusiya, Azərbaycan və Ermənistan liderlərinin qərarı ilə 2021-ci ildə üç ölkənin baş nazirinin müavinlərinin birgə sədrliyi ilə yaradılmış üçtərəfli qrupun tamhüquqlu işini tez bir zamanda bərpa etməyi zəruri hesab edir...
Poliqon xəbər verir ki, bunu news.ru portalına müsahibəsində Rusiya xarici işlər nazirinin müavini Mixail Qaluzin deyib.
Rusiya XİN nümayəndəsi qeyd edib ki, Qərb ölkələrinin təzyiqi ilə İrəvan Cənubi Qafqazda iqtisadi və nəqliyyat kommunikasiyalarının bloklanması üzrə üçtərəfli əməkdaşlığı dondurmaq qərarına gəlib.
"Bu, təkcə Cənubi Qafqazın nəqliyyat-kommunikasiya sisteminin blokdan çıxarılması üçün deyil, həm də regionda davamlı sülh və rifahın bərqərar olması üçün vacibdir", deyə nazir müavini bildirib.
Qaluzin sözlərinə görə, Avropa ittifaqı missiyası Ermənistanın qonşularına, o cümlədən İrana qarşı getdikcə daha çox iş görür və açıq şəkildə təxribat xarakterli fəaliyyətlər həyata keçirir.
"Missiyanın Aİ-nin hibrid müharibəsinin aləti olması faktı onun məxfiliyini, məsuliyyətsizliyini və istər Ermənistan, istər Azərbaycan, istərsə də digər maraqlı dövlətlər və strukturlar tərəfindən nəzarətsizliyini təsdiqləyir. Missiya açıq şəkildə təxribat xarakterli fəaliyyət göstərir, tam şəkildə anti-Rusiya təbliğatı ilə məşğul olur, Ermənistan cəmiyyətində Avropa İttifaqının Ermənistan üçün "təhlükəsizlik və firavanlıq mənbəyi" olması barədə yanlış fikirlər aşılayır", deyə Qaluzin əlavə edib.
Onun fikrincə, əgər uzunmüddətli regional təhlükəsizliyin, sabitliyin və sosial-iqtisadi inkişafın təmin edilməsi vəzifələrindən danışırıqsa, o zaman qərblilərin regionu hərbiləşdirmək və orada Aİ və NATO-nun hərbi-siyasi təsirini genişləndirmək planları tamamilə uyğunsuzdur.
Ermənistan, Rusiya Federasiyası və Azərbaycan baş nazirlərinin müavinlərinin sonuncu görüşü 2023-cü ilin iyununda olub. Sonra Overçuk, Qriqoryan və Mustafayev Yeraşx-Culfa-Meğri-Horadiz marşrutu ilə bağlı razılığa gəliblər.
Xatırladaq ki, 2021-ci il yanvarın 11-də Azərbaycan, Ermənistan və Rusiya və liderləri - İlham Əliyev, Nikol Paşinyan və Vladimir Putin arasında aparılan danışıqlardan sonra baş nazir müavinlərinin rəhbərliyi ilə işçi qrupunun yaradılacağı bildirilmişdi. Aşağıdakı ekspert alt qrupları yaradılmalı idi: dəmir yolu, avtomobil və kombinə edilmiş daşımalar üçün; daşımanın təmin edilməsi məsələləri, o cümlədən təhlükəsizlik, sərhəd, gömrük, sanitariya, baytarlıq, fitosanitariya və digər nəzarət növləri üzrə.
Poliqon.info
Digərxəbərlər
Populyar xəbərlər
