Finlandiya prezidenti Aleksandr Stubb Ukrayna Silahlı Qüvvələrinin Rusiya Federasiyasının Kursk vilayətinə irəliləməsini şərh edərkən bildirib ki, Ukrayna özünü müdafiə etmək hüququna malikdir və Finlandiyanın verdiyi silahlardan Rusiyanın ərazisində istifadə edə bilər...
Poliqon xəbər verir ki, bu barədə o, Aland adalarına səfəri zamanı bildirib.
Stubbın sözlərinə görə, Ukraynanın Kursk bölgəsinə doğru irəliləməklə özünü müdafiə etmək hüququ var, çünki Rusiya mütəmadi olaraq Kiyevi bombalayır və Ukraynanın əhəmiyyətli ərazilərini işğal edib.
"Biz ukraynalıların fəaliyyətini məhdudlaşdırmaq üçün heç bir səbəb görmürük. Ukraynanın hansı silahlardan və hansı şəkildə istifadə edə biləcəyinə dair heç bir məhdudiyyətimiz yoxdur. Başlanğıc nöqtə ondan ibarətdir ki, Ukrayna beynəlxalq hüquq çərçivəsində özünü müdafiə etmək hüququna malikdir", deyə Stubb bildirib.
Qeyd edək ki, Ukrayna Silahlı Qüvvələrinin baş komandanı Aleksandr Sırski avqustun 12-də müdafiə qüvvələrinin Kursk vilayəti ərazisində hücum əməliyyatı keçirdiyini təsdiqləyib.
Avqustun 13-də prezident Volodimir Zelenski bəyan edib ki, Kursk vilayətində 74 yaşayış məntəqəsi Ukrayna Silahlı Qüvvələrinin nəzarəti altındadır.
Ukrayna Xarici İşlər Nazirliyinin sözçüsü Georgi Tıxi vurğulayıb ki, Kursk vilayətində əməliyyatın məqsədi xarici əraziləri ələ keçirmək deyil, vətəndaşların həyatını qorumaq və Ukrayna ərazisini Rusiyanın hücumlarından qorumaqdır.
Poliqon.info