Yaxın vaxtlarda Ermənistan XİN rəhbərinin Rusiyaya səfəri baş tutacaq...
Ermənistan və Rusiyanın xarici işlər nazirləri Ararat Mirzoyan və Sergey Lavrov Moskvada Avropa İttifaqının Azərbaycanla sərhəddə missiyasının yerləşdirilməsi məsələsini müzakirə edəcəklər.
Poliqon.info xəbər verir ki, bunu cümə günü Ermənistan xarici işlər nazirinin müavini Paruyr Hovhannisyan parlamentdə deyib.
“Biz hamımız bilirik ki, Rusiya Aİ missiyasına həssas yanaşır, biz bu məsələni tərəfdaşlarımızla müzakirə edirik”, deyə Hovhannisyan bildirib.
O, qeyd edib ki, yaxın vaxtlarda XİN rəhbərinin Moskvaya səfəri planlaşdırılır və bu məsələ mütləq müzakirə olunacaq.
Bundan əvvəl Rusiya Xarici İşlər Nazirliyinin rəsmi nümayəndəsi Mariya Zaxarova martın 20-də Moskvada Rusiya və Ermənistan XİN başçılarının görüşünün keçiriləcəyini bildirmişdi.
Danışıqların gündəliyinə regional məsələlər, o cümlədən Laçın yolu ətrafında və bütövlükdə Dağlıq Qarabağda vəziyyətin nizamlanması, Rusiya, Ermənistan və Azərbaycan liderləri arasında üçtərəfli razılaşmaların həyata keçirilməsi daxildir.
Xarici işlər nazirliklərinin rəhbərləri həmçinin inteqrasiya layihələri çərçivəsində əməkdaşlığın inkişafı və qarşılıqlı fəaliyyətin gücləndirilməsi istiqamətində addımları müzakirə edəcəklər. Hazırkı beynəlxalq gündəliyə dair fikir mübadiləsinin aparılması, müxtəlif beynəlxalq platformalarda fəaliyyətlərin əlaqələndirilməsi də planlaşdırılır.
Poliqon.info