Liviya parlamentinin sədri Saleh: Baş nazir postu üçün 7 nəfər mübarizə aparır...
Poliqon “RİA Novosti” Agentliyinə istinadən xəbər verir ki, Liviyanın baş naziri postuna namizədlərin sayı 7 nəfərə çatıb. Bu barədə ölkə parlamentinin spikeri Akilah Saleh məlumat verib.
Parlament rəhbərinin sözlərinə görə, siyasətçilərin seçki prosesində iştirak etmək üçün verdiyi ərizələr lazımi tələblərə cavab verir. Bununla belə, Liviya hökumətinə kimin başçılıq edəcəyi barədə qərar qəbul etməzdən əvvəl hakimiyyət orqanları BMT missiyası ilə onun nümayəndələrinin müvafiq iclasda iştirakını razılaşdırmalıdır. Bu, beynəlxalq ictimaiyyətdə Nazirlər Kabinetinin yeni sədrinin legitimliyi ilə bağlı sualların olmaması üçün lazımdır.
Spiker həmçinin qeyd edib ki, 6+6 komitəsi (Liviyanın Ali Dövlət Şurasının və birpalatalı parlamentin üzvlərindən ibarətdir) vahid hökumətin yaradılması tələbini irəli sürüb. Bu göstərişin icrası çərçivəsində qanunverici orqan müvafiq məqsədə nail olmaq mexanizmini təsdiqləyib.
“Namizəd milli şuradan 20, parlamentdən isə 15 və ya 10 imza alır, kim bunu alarsa, onun adı parlamentə təqdim olunacaq və namizədlərdən biri etimad səsi alacaq”, deyə Saleh bildirib.
Xatırladaq ki, hazırda Liviyada bir-birini tanımayan iki administrasiya fəaliyyət göstərir. Onlardan biri, Milli Birlik Hökuməti (GNU) BMT tərəfindən dəstəklənir və Tripolidə yerləşir. İndi ona Abdel Hamid Dbeibah rəhbərlik edir.
Digər administrasiya da öz növbəsində Benqazidə yerləşir. Bu hökumət səlahiyyətlərini keçmiş parlamentdən alıb və ona Usamə Hammad rəhbərlik edir.
Poliqon.info