ABŞ ikitərəfli təmasları təşfiq etməklə digər vasitəçi olmaq həvəsində olan qüvvələrdən fərqli olaraq nəyə can atır?..
Azər Qasımov: “ABŞ adminstrasiyasının Azərbaycan-Ermənistan münaqişəsində 44 günlük müharibə və Azərbaycanın qələbəsindən sonra tutduğu mövqe əksər hallarda konstruktiv olub”.
“Vaxtı ilə ABŞ-ın Qarabağ məsələsi ilə demək olar ki, məşğul olmadığından şikayətlənirdik. Amma son illər ABŞ ən yüksək səviyyədə bu məsələlərə daxil olur”.
Bu sözləri politoloq Azər Qasımov ABŞ Dövlət Departamentinin Azərbaycan və Ermənistan münasibətləri ilə bağlı bəyanatını Poliqon-a şərh edərkən qeyd edib.
ABŞ Dövlət Departamentinin Azərbaycanla Ermənistan arasındakı münasibətlərin normallaşdırılması ilə bağlı danışıqlarda əldə etdiyi irəliləyişi, o cümlədən sərhədlərin delimitasiyasının tənzimlənməsi haqqında Əsasnaməyə dair razılaşmaları alqışlayıb.
Bu yazılı bəyanat Vaşinqtonun Azərbaycan və Ermənistanın ikitərəfli təmaslarına üstünlük verməsi anlamına gəlirmi? Ümumiyyətlə, ABŞ ikitərəfli təmasları təşfiq etməklə digər vasitəçi olmaq həvəsində olan qüvvələrdən fərqli olaraq nəyə can atır?
ABŞ-ın vasitəçilik təşəbbüsünü Poliqon-un əməkdaşı politoloq Azər Qasımov ilə müzakirə edib.
Azər Qasımov: “ABŞ Azərbaycan və Ermənistan arasında ikitərəfli danışıqlarda üstünlük verməsi xüsusilə diqqətəlayiqdir”.
Sonrakı proseslərin necə olmasından asılı olmayaraq ABŞ-ın Azərbaycan və Ermənistan arasında sülh müqaviləsi imzalanması məsələsinə baxışını qənaətbəxş hesab edən politoloq Poliqon-a açıqlamasında qeyd edib ki, bundan maksimum istifadə etmək lazımdır:
“ABŞ administrasiyasının Azərbaycan-Ermənistan münaqişəsində 44 günlük müharibə və Azərbaycanın qələbəsindən sonra tutduğu mövqe əksər hallarda konstruktiv olub. ABŞ Azərbaycan və Ermənistan arasında sülhü təşviq edən başlıca ölkə olub. ABŞ-da baş tutan bir neçə günlük sülh danışıqları da bunu sübut edir. ABŞ ümumiyyətlə bu məsələ ilə son illər daha çox məşğul olmağa başlayıb.
Vaxtı ilə ABŞ-ın Qarabağ məsələsi ilə demək olar ki, məşğul olmadığından şikayətlənirdik. Amma son illər ABŞ ən yüksək səviyyədə bu məsələlərə daxil olur. Bu reallığı isə Azərbaycan dövləti yaradıb. Cənubi Qafqazın geosiyasi çəkisi Azərbaycanın qələbəsindən sonra artıb, xüsusilə də, Zəngəzur dəhlizi məsələsi.
Azər Qasımov: “ABŞ bu addımı ilə regionda maraqlı olan qüvvələrə də mesaj verir ki, ABŞ-ın regionda maraqları sülhdən ibarətdir, ona görə onlar da geosiyasi oyunlardan kənar dayansınlar”.
ABŞ Azərbaycan və Ermənistan arasında ikitərəfli danışıqlarda üstünlük verməsi xüsusilə diqqətəlayiqdir. ABŞ hər iki ölkəyə regionda sülhdə maraqlı olduğu mesajını verir. Onların gəldikləri nəticənin onlar tərəfindən də qəbul ediləcəyini bildirmək istəyir. ABŞ bu addımı ilə regionda maraqlı olan qüvvələrə də mesaj verir ki, ABŞ-ın regionda maraqları sülhdən ibarətdir, ona görə onlar da geosiyasi oyunlardan kənar dayansınlar. Təbii ki, ABŞ-ın planı sülh müqaviləsi imzalanmasından sonrasına hesablanıb. ABŞ regionda demokratiya oyunu adı altında yerləşmək istəyir. Rusiyanı Ermənistandan qovmağı planlayır.
Hesab edirəm ki, sonrakı proseslərin necə olmasından asılı olmayaraq ABŞ-ın Azərbaycan və Ermənistan arasında sülh müqaviləsi imzalanması məsələsinə baxışını qənaətbəxş hesab etmək olar və bundan maksimum istifadə etmək lazımdır. Sonrakı proseslər isə sonranın işidir”.
Nərminə UMUDLU
Poliqon.info