İranın sahil mühafizə xidməti Fars körfəzi bölgəsində yanacaq qaçaqmalçılığı şübhəsi ilə daha bir xarici gəmini saxlayıb
Virtualaz.org yerli KİV-ə istinadən bildirir ki, saxlanılan gəminin ekipaj üzvləri Filippin vətəndaşlarıdır.
Gəmidən 283 900 litr qaçaq yanacaq müsadirə olunub. Amma gəminin kimə məxsus olduğu, habelə onun marşrutu barədə məlumat verilməyib.
Gəminin saxlanılan heyət üzvlərinin barəsində cinayət işi başlanılıb və onlar məhkəməyə təhvil veriliblər.
Xatırladaq ki, İran ətrafında vəziyyət iyunun 13-də Oman körfəzində iki tankerdə partlayışlar və yanğınlar baş verdikdən sonra kəskinləşdi. ABŞ hadisəyə görə, İranı günahlandırdı, İngiltərə və Səudiyyə Ərəbistanı ona dəstək versələr də, Tehran bu iddiaları rədd etdi.
İyulun 19-da isə İran İslam İnqilabı Keşikçiləri Korpusunun (SEPAH) Hərbi Dəniz Donanması Hörmüz boğazında Britaniyanın "Stena impero" adlı neft tankerini, beynəlxalq dəniz qaydalarına əməl etmədiyini əsas gətirərək, saxladı. İngiltərə hakimiyyəti iddia edir ki, İran beynəlxalq hüququ pozaraq “Stena Impero”nu Omanın ərazi sularında saxlayıb, daha sonra isə tankeri öz sularına daxil olmağa məcbur edib.
pia.az