Çin Rusiyaya hərbi dəstək verməsini təkzib edir: Münaqişə bölgələrinə öldürücü silah satmırıq...

Poliqon xəbər verir ki, bu barədə İsveçrənin Neue Zuercher Zeitung nəşrinə müsahibəsində Çinin İsveçrədəki səfiri Van Şıxtin bildirib.

"Çin sülh danışıqlarının təşviqinin tərəfdarıdır və həmişə buna sadiq olub. Biz böhranın daha da pisləşməsinin və hətta nəzarətdən çıxmasının qarşısını almalıyıq. Biz İsveçrənin ev sahibliyi edəcəyi Ukrayna konfransını diqqətlə izləyirik və orda iştirakın mümkünlüyünü nəzərdən keçiririk", deyə o vurğulayıb.

Çin nümayəndəsi əlavə edib ki, münaqişənin gərginliyini azaltmaq üçün Rusiya və Ukraynanı mümkün qədər tez birbaşa dialoqu bərpa etməyə təşviq etmək lazımdır. Səfir əlavə edib ki, sanksiyalar münaqişəni dayandıra bilməz, onlar yalnız yeni problemlər yaradır.

"Münaqişə başlayandan Çin həmişə sülh danışıqlarını dəstəkləyib... Biz həqiqətən ümid edirik ki, yaxın gələcəkdə sülh bərpa olunacaq və obyektiv həll tezliklə tapılacaq", deyə səfir vurğulayıb.

Çinin Rusiyaya hərbi dəstək verib-verməməsi ilə bağlı sualı cavablandıran Çin səfiri bu cür ittihamları əsassız və çox ədalətsiz adlandırıb.

"Bu ilin fevralında Münhen Təhlükəsizlik Konfransı çərçivəsində ukraynalı həmkarı Dmitri Kuleba ilə görüşündə Çinin xarici işlər naziri Van Yi vurğulayıb ki, Çin siyasi qərara sadiqdir, sülh danışıqlarını təşviq edir, atəşə benzin qatmır və Çin münaqişə bölgələrinə və tərəflərə öldürücü silah satmır", deyə səfir əlavə edib.

Poliqon.info