Avqustda Ukraynaya təhvil verilməli olan F-16 qırıcılarını idarə etmək üçün yalnız 6 ukraynalı pilot təlim proqramını başa vurub...
Poliqon xəbər verir ki, bu barədə The Telegraph nəşri yazıb. Ümumilikdə, bu il Ukrayna yalnız bir F-16 eskadronu, təxminən 20 qırıcı alacaq ki, bu da gözlənildiyindən xeyli azdır.
Aviasiya sahəsində ixtisaslaşmış "Fighterbomber" Telegram kanalı bildirib ki, 6 pilotla Ukrayna eyni anda cəmi 2 qırıcıdan istifadə edə biləcək, çünki pilot gecə-gündüz işləyə bilməz.
"İki pilot ümumilikdə gündə maksimum 10 döyüş uçuşu edə bilər. Bütün Ukrayna üçün 10 F-16 uçuşu heç bir şey deyil", deyə "Fighterbomber" bildirib.
Ukrayna prezidenti Volodimir Zelenski və Ukrayna hərbçiləri Qərb qırıcılarının tədarükü ilə bağlı vəziyyətdən məyus olduqlarını ifadə edərək, onların çox az və çox gec olduğunu vurğulayıblar. Qeyd ediblər ki, F-16-lar nəhayət Ukraynaya çatdıqda, ümid edildiyi kimi həlledici amil olmayacaq.
Səbəblərdən biri onların müdafiə məqsədi ilə yerləşdiriləcəyidir, çünki Rusiya Federasiyası hələ də səmaya nəzarət edir və bütün cəbhə xəttində hava hücumundan müdafiə sistemləri quraşdırıb və bu, F-16-ları riskə atır. "Biz hava hücumundan müdafiə təhlükəsinə görə ruslara çox yaxın döyüş təyyarələrindən istifadə etməyəcəyik", deyə Ukrayna rəsmilərindən biri bildirib.
Ukrayna hakimiyyəti iki ildir ki, Rusiyanın səmada hökmranlığına qarşı çıxmaq üçün Qərb müttəfiqlərindən F-16 qırıcıları istəyir. Danimarka, Niderland, Norveç və Belçika tərəfindən Ukraynaya ümumilikdə 80 ədəd F-16 qırıcısı vəd edilib. Ancaq əvvəllər böyük ümidlər bəslənsə də, onların tədarükü ilə bağlı iş o qədər ləngiyib ki, yararsız hala düşə bilərlər. Bəzi hərbi ekspertlər hətta bu təyyarələrdən istifadənin müharibənin gedişatını dəyişdirə biləcəyini proqnozlaşdırırdılar.
Poliqon.info