Braziliya və Nikaraqua bir-birinin səfirlərini ölkədən çıxarıb

Poliqon xəbər verir ki, bu barədə “Globo” nəşri Xarici İşlər Nazirliyindəki mənbələrə istinadən məlumat yayıb. Nəşr yazır ki, buna cavab olaraq Braziliya hökuməti Nikaraqua səfiri Fulvia Kastronu ölkədən çıxarmaq qərarına gəlib.

Braziliya səfirliyinin hakim partiyanın Nikaraquada Sandinista İnqilabının qələbəsinin 45-ci ildönümünü qeyd etməsinə öz nümayəndələrini göndərməməsi iyul ayında iki ölkə arasında münasibətlərin gərginləşməsinə səbəb olub. Braziliya rəsmiləri ölkə səfirinin mərasimlərə qatılmamasında heç bir səhv görmədiklərini söyləyərək gərginliyi daha da artırıb.

“Globo” qeyd edir ki, Braziliya hakimiyyətinin qərarı Nikaraquanın katolik kilsəsinə qarşı siyasəti ilə razılaşmadığı üçün verilib. 2023-cü ilin fevralında Mataqalpa yepiskopu, monsenyor Rolando Xose Alvares Nikaraquada 26 il həbs cəzasına məhkum edilib. Braziliya prezidenti Luiz İnasio Lula da Silva yepiskopun azad edilməsi məsələsində Vatikan və Nikaraqua arasında vasitəçilik etməyə çalışıb.

2022-ci ildə Nikaraqua prezidenti Daniel Orteqa Katolik Kilsəsini dövlət çevrilişinə cəhddə ittiham edib. 2023-cü ilin martında Nikaraqua Vatikanla diplomatik əlaqələri dayandırıb.

Poliqon.info