Türkiyəni öz tərəflərinə çəkməyə çalışacaqlar. Amma əsas məsələ Türkiyəni şimaldan mühasirəyə almaq olacaq...
İbrahim Karagül
“Yeni Şafak” qəzeti, Türkiyə, 12 noyabr 2021-ci il
ABŞ ordusu Türkiyə sərhədindən 20 kilometr aralıda yerləşən Aleksandrupolini kazarmaya çevirib. İndi isə iyul ayında buraya gətirdiyi 400 zirehli texnikaya 1000 tank və zirehli texnika, 120 hücum helikopteri və 3000 əsgər əlavə edir.
Elə isə soruşmaq lazımdır ki, bu hərbi birləşmə Yunanıstanı qorumaq üçün mü edilir? Yunanıstan kimdən müdafiə edilir? Bu hərbi birləşmə Rusiya təhlükəsinə qarşı aparılırmı? Bəs Rusiya haradadır?
Bu hərbi birləşmənin məqsədi Türkiyəyə hücum etməkdirmi? Elədirsə, niyə? Bu ordu quruculuğu 15 İyul kimi yeni bir “daxili müdaxilə” zamanı “kənardan hərbi dəstək” vermək məqsədi daşıyırmı? Türkiyə sərhədinin düz yanında aparılan bu hazırlığın məqsədi nədir?
Qərbi Trakya Türkiyəyə hücum üçün nəzərdə tutulan bir cəbhə ola bilərmi? Görəsən, Suriyanın şimalında Cənub Cəbhəsi qurduqları kimi, bu dəfə də Yunanıstanda yeni “Qərb Cəbhəsi” və ya “Türk Cəbhəsi” qururlar?
Şərqi Aralıq dənizində Türkiyəyə qarşı beynəlxalq ittifaq qurduqları, Ege adalarını silahlandırdıqları, sahillərində raket anbarları qurduqları kimi, Qərbi Trakyada da Türkiyəyə qarşı hücum cəbhəsi yaradılırmı?
20 kilometr məsafədə, az qala sərhədin sıfır nöqtəsində gedən bu hazırlıq nədən xəbər verir? Tutaq ki, bunun Türkiyə ilə heç bir əlaqəsi yoxdur. Bəs bu qədər yaxın mövqedə olmaq necə kobud bir səhvdir? Bu, hamımızla əlaqəli bir təhlükə, narahatlıq mənbəyi deyilmi?
Tarix, xüsusilə də Birinci Dünya Müharibəsi, Qurtuluş Müharibəsi bizə çox şey öyrətdi. Yaşadığımız “fövqəladə hallar əsrində” bu kimi qeyri-adi hallar belə ağır faktları qarşımızda çıxarır. Türkiyədə geniş kütlənin beyni siyasi müxalifətin yalan və uydurmalarına aldanarkən, kimlərsə bu faktları diqqətimizdən yayındırmağa çalışarkən, “Qərbdən mühasirə” planları ilə cənubdan mühasirə cəhdləri hələ də davam edir.
Belə bir hazırlığı necə görməmək olar? Necə sosial reaksiya göstərməyə bilərik? Bunları unutdurmaq istəyənlərə qarşı necə ola bilər ki, tədbir görülməz?
Onlar belə xəritələri Birinci Dünya Müharibəsindən sonra çəkdilər. Türkiyənin cənub sərhədlərində cəbhə tikilərkən biz buna “terror dəhlizi” deyirdik. Biz bunu terror məsələsi kimi müzakirə etdik. Amma, əslində, belə deyildi. Terror sadəcə aparat idi. İran sərhədindən Aralıq dənizinə, Ərəb-İslam dünyası ilə Türkiyə arasında qalın divar tikilir, bufer xəritəsi çəkilirdi.
Bu, Birinci Dünya Müharibəsindən sonra çəkilmiş xəritələrlə eyni təşəbbüs idi. Onlar 21-ci əsrin birinci yarısında xəritələri yeniləyirdilər. O dövrün Anadolu xəritəsi daha da kiçiləcəkdi. Qərbin “terror” adı altında həyata keçirdiyi bu ehtiyatsızlıq, təkəbbür və “müstəmləkəçi patron” münasibəti Türkiyəyə dəyib dağıldı.
Bundan dərhal sonra Şərqi Aralıq dənizi böhranı partladı. Məsələ neft və enerji idi. Amma əsas məsələ Türkiyəni Aralıq dənizindən qovmaq, sahillərdə həbs etmək idi. Aralıq dənizinin şərqində az qala səlibçi donanması yaratdılar. Türkiyənin nəfəsini kəsəcəkdilər, amma olmadı. Həmin cəbhə “hələlik” səmərəsiz qaldı.
Mühasirəyə almaq, dayandırmaq, dar məkana sıxışdırmaq
Mühasirə xəritəsi genişlənirdi. Egeydə, adalarda və Yunanıstanın Türkiyəyə ən yaxın bölgələrində hərbi bazalarını və tikintilərini sürətləndirməyə başladılar. Rumıniya və Bolqarıstanda on ildir ki, hazırlıq gedirdi. Onları “Avropanı Rusiyaya qarşı bir müdafiə” kimi bazara çıxarsalar da, son dövrlərdə Yunanıstan üzərində qurulan, quruda və dənizdə görülən hazırlıqlarla birlikdə nəzərə alındıqda, tamamilə Türkiyə ilə bağlı olduqları ortaya çıxıb.
Hamısı Türkiyəni mühasirəyə almaq, dayandırmaq, dar bir məkana sıxışdırmaq məqsədi daşıyır. Bu, Türkiyənin yüksəlişinə qarşı bütün Qərbin birgə əməliyyatıdır. Bu da ABŞ və Avropanın Türkiyə ilə bağlı bütün quru sərhədlərində, bütün dənizlərdə və coğrafiyanın bir çox nöqtəsində əhatəli planı olduğunu göstərməklə yanaşı, həm də Türkiyənin Qərbdən qoparaq öz yolunu tutmasının əvəzini çıxmağa çalışacaqlarını ortaya qoydu.
Qara dəniz böhranını partlatacaqlar və şimaldan da əhatə edəcəklər. Egeydə, adalarda və Yunanıstanda, eləcə də Rumıniya və Bolqarıstanda hazırlıqlar müəyyən ardıcıllığa çatdıqda Qara dəniz böhranını partladacaq. Göründüyü kimi, Rusiyaya qarşı gərginlik daha da artacaq. Türkiyəni öz tərəflərinə çəkməyə çalışacaqlar. Amma əsas məsələ Türkiyəni şimaldan mühasirəyə almaq olacaq.
Səbəb Cənub Cəbhəsi üçün terror, Qərb Cəbhəsi üçün Yunanıstanın təhlükəsizliyi olduğu kimi, Rusiya təhlükəsi də Qara Dəniz/Şimal Cəbhəsi üçün olacaq. Marketinq məhz belə aparılır.
Türkiyəni də ölümcül seçimlə qarşı-qarşıya qoyacaqlar. Qara dənizdə gərginliyi o qədər artıracaqlar ki, Türkiyənin qarşısına “ya bizimlə, ya da Rusiya ilə” seçimini qoyacaqlar.
Aleksandrupolidəki toplanma Qərbdə Türkiyəyə qarşı qurulan cəbhənin ən kritik mərhələsidir. Qərblə əsrlərlə uzun və ağrılı keçmişi olan Türkiyə, təbii ki, Qərbin bütöv bir imperiyanı parçalayan, geridə qalanların genlərinə müdaxilə edən bu hərəkatını doğru başa düşəcək.
Tərcümə PİA.az-ındır.
Fatimə ƏLİYEVA
pia.az