Yəməndə husilər hipersəs raketi sınaqdan keçirib

Poliqon xəbər verir ki, bu barədə “Ənsar Allah” hərəkatına yaxın hərbi mənbə “RİA Novosti” Agentliyinə bildirib. Agentliyin mənbəsinin sözlərinə görə, husilər bu tip raketləri öz hərbi arsenalına daxil etmək niyyətindədirlər.

Mənbənin “RİA Novosti”yə verdiyi məlumata görə, söhbət 10 min km/saat sürətə çata bilən raketdən gedir. Raket bərk yanacaqla işləyir.

Mənbə Husi qüvvələrinin raket sınağını “uğurlu” kimi qiymətləndirib. Onun sözlərinə görə, Yəmən bu raketi Qırmızı və Ərəbistan dənizlərində, Ədən körfəzində, eləcə də İsraildəki hədəflərə qarşı hücumlar üçün istifadə olunacaq hərbi arsenalına daxil edəcək.

Agentliyin mənbəsi əlavə edib ki, husilər hipersəs raketini sınaqdan keçirməklə yanaşı, partlayıcı döyüş başlıqlarını dəyişdirərək raket və PUA-larını da yeniləyiblər. “RİA Novosti”nin həmsöhbətinin sözlərinə görə, bu, husilərin hücumlarının dağıdıcı gücünü ikiqat artırmağa imkan verib.

Qeyd edək ki, Yəmən husiləri 2023-cü ilin noyabrında ABŞ və Britaniya gəmilərinə, eləcə də İsraillə əlaqəli olduğuna inandıqları gəmilərə hücum etməyə başlayıblar. Onlar hərəkətlərini İsraillə müharibədə Fələstinin HƏMAS hərəkatına dəstək verməklə izah edirlər.

Poliqon.info