Avropa Şurasının prezidenti Şarl Mişel vəzifəsini vaxtından əvvəl tərk edərək Avropa Parlamentinə seçkilərdə iştirak etmək qərarına gəlib...
Poliqon xəbər verir ki, bu barədə Mişel Belçikanın “De Standaard”, “Le Soir” və “La Libre” qəzetlərinə müsahibəsində bildirib. Qeyd edək ki, Avropa Şurasının rəhbəri və Avropa Parlamentinin deputatı vəzifələri birləşdirilə bilməz.
“Mən 2024-cü ildə keçiriləcək Avropa seçkilərində iştirak etmək qərarına gəldim. Əgər seçilsəm, yerimi tutacağam. Avropa Şurası iyunun sonu və ya iyulun əvvəlində yeni rəhbərini müəyyənləşdirə bilər”, deyə Mişel bildirib.
Avropa Şurasının rəhbəri seçkilərə “İslahat Hərəkatı” partiyasından qatılacaq. Mişel iyulun 16-da Avropa Parlamentinin üzvü kimi and içənə qədər Avropa Şurasının rəhbəri vəzifəsini icra etmək niyyətindədir.
Qeyd edək ki, Şarl Mişel 2019-cu ildən Avropa Şurasına rəhbərlik edir, ondan əvvəl isə Belçika hökumətinin başçısı olub. Onun səlahiyyət müddəti 2024-cü il noyabrın sonunda başa çatır.
Avropa Parlamentinə seçkilər iyunun 6-dan 9-dək keçiriləcək. Onların ardınca Avropa Komissiyasının yeni tərkibinin təsdiqi və Avropa Şurasının yeni prezidentinin seçilməsi keçiriləcək.
Avropa Şurasının rəhbəri səlahiyyətlərinin eyni müddətə uzadılması imkanı ilə 2,5 il müddətinə təyin edilir.
Poliqon.info