Federal Tədqiqat Bürosu Respublikaçı namizəd Donald Trampın kampaniyasına İran tərəfindən dəstəklənən hakerlərin mümkün kiberhücumunu araşdırır...
Poliqon xəıbər verir ki, bu barədə TASS Agentliyi FTB-nin nümayəndələrinə istinadən məlumat yayıb.
Xatırladaq ki, avqustun 10-da Politico qəzeti Donald Trampın seçki qərargahının kütləvi kiberhücuma məruz qaldığını yazıb. Nəşrin mənbələri məlumat bazasının sındırılmasına görə İranın məsuliyyət daşıdığını irəli sürüb. Lakin Respublikaçıların seçki kampaniyasının sözçüsü Stiven Çunq bu məlumatı təsdiq və ya təkzib etməkdən imtina edib. Çunq yalnız qeyd edib ki, hücumda ABŞ-a düşmən olan xarici hakerlər iştirak edib.
“Biz təsdiq edə bilərik ki, FTB bu məsələ ilə bağlı təhqiqat aparır”, deyə TASS Agentliyi adı açıqlanmayan nümayəndəsindən sitat gətirib.
Ağ Evin mətbuat katibi Karine Jean-Pierre avqustun 12-də axşam keçirdiyi brifinqdə deyib ki, kiberhücumda İranın əli olması ilə bağlı iddiaların doğruluğunu şərh etməyə hazır deyil.
CNN telekanalı mənbələrə istinadən yazır ki, FTB-nin versiyalarından birinə görə hakerlər Donald Trampın keçmiş müşaviri, siyasi strateq Rocer Stounun elektron poçtunu sındırıblar. The Washington Post qəzetinin mənbələri iddia edirlər ki, İranla əlaqəsi olduğu iddia edilən hakerlər təkcə Trampın deyil, ABŞ prezidenti Co Baydenin seçki yarışından geri çəkilməzdən əvvəl onun seçki qərargahına hücum etməyə cəhd ediblər.
Poliqon.info