Respublikaçıların prezidentliyə namizədi Donald Tramp bildirib ki, seçkidə qalib gələrsə, Vladimir Putinlə yenidən “anlaşacağına” ümid edir...
Poliqon xəbər verir ki, Tramp bu barədə iş adamı İlon Maska müsahibəsində bildirib. Sabiq prezidentin fikrincə, Rusiya prezidenti “yaxşı danışıq aparandır”. Müsahibə X sosial şəbəkəsində aparılıb.
Həmçinin İlon Maska müsahibəsində cənab Tramp prezidentlik dövründə Vladimir Putinlə yaxşı münasibətlər saxladığını qeyd edib.
“Mən Putini çox yaxşı tanıyıram. Onunla çox yaxşı anlaşırdım, mənə hörmət edirdi. Ümid edirəm ki, onunla yenidən anlaşacağıq. Bilirsən, onunla yol tapmaq pis deyil, yaxşı olardı”, deyə Tramp vurğulayıb.
Donald Tramp hesab edir ki, Rusiya prezidenti “yaxşı danışıq aparan”dır, Amerika prezidenti Co Bayden isə “aşağı İQ” səviyyəsinə malikdir. Onun fikrincə, Bayden Ukraynanın NATO-ya daxil olması ehtimalına icazə verərkən axmaqlıq edir.
Xatırladaq ki, Donald Trampın prezidentlik müddəti 2017-ci ildən 2021-ci ilə qədər davam edib. O, dəfələrlə bildirib ki, o vaxt Vladimir Putinlə yaxşı münasibəti olub. Kreml Donald Trampın dövründə tətbiq edilən sanksiyalara diqqət yetirib. Məsələn, 2019-cu ildə Tramp “Şimal axını 2” layihələrinin operatorlarına qarşı sanksiyaları nəzərdə tutan müdafiə büdcəsini imzalayıb.
Poliqon.info