Rusiyanın Avropa İttifaqındakı Nümayəndəliyinin mətbuat xidməti dondurulmuş Rusiya aktivlərindən əldə edilən gəlirlərin Ukraynaya kömək məqsədilə istifadə edilməsinə icazə verən Aİ Şurasının son qərarını şərh edib...
Poliqon xəbər verir ki, bu barədə Rusiya nümayəndəliyinin Telegram kanalında bildirilib. Diplomatik nümayəndəlik Aİ-nin qərarını oğurluq adlandırıb və qeyd edib ki, gec-tez Avropa İttifaqı bütün aktivlərini Rusiyaya qaytarmalı olacaq.
“Yaradılan presedentin nəticələri, o cümlədən avrozona, bloka üzv ölkələrin iqtisadiyyatları və investisiya mühiti üçün mütləq gözlənilməz olacaq. Yalnız bir şeyi proqnozlaşdırmaq olar - gec-tez Aİ üzvləri oğurlananları ölkəmizə qaytarmağa məcbur olacaqlar”, deyə Rusiya nümayəndəliyinin bəyanatında deyilir.
Diplomatik missiya əlavə edib ki, bu qərarla Brüssel oğurluğu öz xarici siyasətinin alətləri səviyyəsinə qaldırıb.
Xatırladaq ki, Rusiya Bankının Aİ ölkələrində dondurulmuş aktivlərinin vəsaitləri 2024-cü ilin iyul ayından etibarən Ukraynaya göndəriləcək. Bunu Avropa Komissiyası açıqlayıb. 2024-cü ildə əldə edilən mənfəətin 90%-nin Avropa Sülh Fondu vasitəsilə hərbi yardımın çatdırılmasına yönəldilməsi planlaşdırılır. 2024-cü ildə Ukrayna bu vəsaitdən 3 milyard avro ala bilər.
Qeyd edək ki, 2022-ci ilin fevralında Rusiya qoşunlarının Ukraynaya daxil olmasından sonra Avropa İttifaqı və G7 ölkələri Rusiya Bankının nağd pul və qiymətli kağızlar şəklində təxminən 280 milyard dollar aktivlərini dondurub.
Poliqon.info
Digərxəbərlər
Populyar xəbərlər
