Venesuela prezidenti Nikolas Maduro argentinalı həmkarı Xavyer Mileyi Venesuela təyyarəsini oğurlayan "dəli quldur" adlandırıb...
Poliqon xəbər verir ki, bu barədə VTV kanalı məlumat yayıb.
ABŞ-ın tələbi ilə ələ keçirilən "Boeing" yük təyyarəsi gizli şəkildə Floridaya aparıldıqdan sonra Maduro "Onlar "Emtrasur" təyyarəsini, quldur Miley Venesuela təyyarəsini oğurladılar" deyib. O, həmçinin qeyd edib ki, Miley ya dəli kimi görünür, ya da əslində dəlidir.
2022-ci ildə bir Venesuela şirkətinin təyyarəsi yanacaq doldurmaq üçün yerə endikdən sonra Argentinada saxlanılıb. Buna səbəb təyyarənin vaxtilə Amerika sanksiyaları altında olan İranın "Mahan Air" aviaşirkətindən alındığı üçün onun həbsini tələb edən ABŞ-ın mövqeyi olub.
Venesuela hökuməti ABŞ və Argentina hakimiyyətini "Boeing 747-300" təyyarəsini "oğurlamaqda" ittiham edib. Venesuelanın xarici işlər naziri İvan Gil Pintonun sözlərinə görə, ABŞ və Argentina mülki aeronavtikanı tənzimləyən bütün normaları kobud şəkildə pozub.
Xarici işlər naziri Venesuelanın təyyarənin "oğurlanmasına" qəti, birbaşa və mütənasib cavab veriləcəyini vurğulayıb. Bu məqsədlə Karakas milli konstitusiya, diplomatiya və beynəlxalq hüquq çərçivəsində bütün mümkün vasitələrdən istifadə edəcək və təyyarənin qanuni sahibinə qaytarılmasına nail olacaq.
Yanvarın 4-də Argentina məhkəməsi ABŞ-ın xeyrinə Venesueladan gələn təyyarənin müsadirə edilməsinə qərar verib.
Poliqon.info