ABŞ müdafiə naziri Lloyd Ostin Qırmızı dənizdə naviqasiya azadlığını təmin etmək üçün çoxmillətli əməliyyata başladığını açıqlayıb...
Poliqon xəbər verir ki, bu barədə Pentaqonun məlumatında bildirilir. ABŞ Müdafiə Nazirliyi əməliyyata səbəb kimi, Yəmən husilərinin ticarət gəmilərinə hücumlarını göstərib. Əməliyyata Böyük Britaniya, Bəhreyn, Kanada, Fransa, İtaliya, Hollandiya, Norveç, İspaniya və Seyşel adaları daxil olacaq.
“Yəməndən husilərin ehtiyatsız hücumlarının son vaxtlar artması ticarətin azad axınını təhdid edir, günahsız dənizçiləri təhlükə altına alır və beynəlxalq hüququ pozur. Bu, kollektiv fəaliyyət tələb edən beynəlxalq çağırışdır. Buna görə də mən bu gün “Prosperity Guardian” (İnkişafın qoruyucusu) əməliyyatının yaradılmasını elan edirəm”, deyə ABŞ müdafiə naziri Lloyd Ostin bəyanatında bildirib.
Pentaqonun rəhbərinin sözlərinə görə, “böyük yeni çoxmillətli təşəbbüs” Birləşmiş Dəniz Qüvvələrinin himayəsi altında fəaliyyət göstərəcək. Koalisiya “bütün ölkələr üçün naviqasiya azadlığını” təmin etmək və “regional təhlükəsizlik və rifahı” gücləndirmək üçün Qırmızı dənizin cənubunda və Ədən körfəzində təhlükəsizlik məsələlərinə diqqət yetirəcək.
Xatırladaq ki, Yəmən husiləri İsrail və Həmas arasında müharibə başlayandan bəri beynəlxalq sularda gəmilərə hücum edir. Husilər müharibədə Fələstin hərəkatını dəstəkləyib və İsraillə əlaqəli gəmilərə hücum edəcəklərini vəd ediblər. Bunun fonunda bir çox şirkətlər Qırmızı dəniz vasitəsilə yük daşımaqdan imtina ediblər.
Poliqon.info