Bakıda cüdo üzrə Böyük Dəbilqə turnirinin açılış mərasimi keçirilib - Yenilənib

Bakıda Ümummilli Lider Heydər Əliyevin 100 illik yubileyinə həsr olunan cüdo üzrə Böyük Dəbilqə turnirinin açılış mərasimi keçirilib.

“Report”un məlumatına görə, tədbir yarışın təşkil olunduğu Milli Gimnastika Arenasında baş tutub.

Mərasimdə gənclər və idman nazirinin müavini Mariana Vasileva, Azərbaycan Cüdo Federasiyasının prezidenti Rəşad Nəbiyev, Avropa Cüdo Birliyinin prezidenti Laslo Tot, həmçinin, digər rəsmi şəxslər iştirak ediblər.

İlk olaraq turnirlə bağlı hazırlanan videoçarx təqdim edilib.

Ardından çıxış edən Mariana Vasileva Azərbaycanda idmanın inkişafından, ölkə başçısı İlham Əliyevin diqqət və qayğısından bəhs edib: “Azərbaycan Cüdo Federasiyası öz işini mərahətlə görür. Artıq ölkənin regionlarında cüdo sürətlə inkişaf edir. Bakıdakı Böyük Dəbilqəyə də dünyanın 61 ölkəsinin idmançısı qatılıb. Onlara uğurlar arzulayıram”.

Daha sonra nitq bildirən Rəşad Nəbiyev turnirin Ulu Öndər Heydər Əliyevin 100 illiyinə həsr olunmasının onlar üçün xüsusi önəm kəsb etdiyini vurğulayıb: “Ulu Öndərin layiqli davamçısı olan Prezident İlham Əliyev Azərbaycanda idmanın inkişafında müstəsna rol oynayır. Biz də ölkəmizdə cüdonun inkişafı üçün əlimizdən gələni edirik. Bu il müxtəlif yaş qrupundan olan cüdoçularımız beynəlxalq yarışlarda uğurla çıxış ediblər”.

Laslo Tot isə fikirlərini bildirdikdən sonra yarışı açıq elan edib: “Mükəmməl təşkilatçılığa görə, Azərbaycan Cüdo Federasiyasına, həmçinin, Gənclər və İdman Nazirliyinə təşəkkürümü bildirirəm. Ümid edirəm ki, tədbir uğurla həyata keçiriləcək”.

Sonda Azərbaycan Dövlət Himni və Beynəlxalq Cüdo Federasiyasının himni səsləndirilib.

Qeyd edək ki, Böyük Dəbilqə turnirində 61 ölkənin 446 (264-ü kişi, 182-si qadın) idmançısı iştirak edir. Azərbaycan millisi yarışa 26 kişi, 7 qadın cüdoçu ilə qatılıb.

***

İlk gündə kişilər iki, qadınlar isə üç çəki dərəcəsində mübarizə aparacaqlar.

Azərbaycan millisinin 13 idmançısı bu gün çıxış edəcək. Onlardan səkkizi kişi, beşi isə qadın cüdoçulardır.

Kişilər

60 kq

Balabəy Ağayev - Lukhumi Çkvimiani (Gürcüstan)
Əhməd Yusifov - Jorre Verstraeten (Belçika)
Rövşən Əliyev - Lior Rafailov (İsrail)
Nazir Talıbov - Giorgi Sardalaşvili (Gürcüstan)

66 kq

Qasım Vəlizadə - Antoni De Angelis (Latviya)
Yaşar Nəcəfov - Yermek Amangeldi (Qazaxıstan)
Rəşad Yelkiyev - Lukas Saha (Finlandiya)/Yanislav Gerçev (Bolqarıstan) cütünün qalibi
Ruslan Paşayev - Tal Fliçer (İsrail)

Qadınlar
48 kq

Ramilə Əliyeva - Marusa Stanqar (Sloveniya)
Şəfəq Həmidova - Meri de Varqas (Çili)
Leyla Əliyeva - Tamar Malca (İsrail)

52 kq

Gültac Məmmədəliyeva - Joana Dioqo (Portuqaliya)

57 kq

Nərgiz Hacıyeva - Timna Nelson Levi (İsrail)

Qeyd edək ki, Böyük Dəbilqə turniri sentyabrın 24-də başa çatacaq.

Poliqon.info