Bayden Münhen Təhlükəsizlik Konfransının xüsusi buraxılışında çıxış edəcək

COVID-19 pandemiyası ilə əlaqədar təxirə salınan Münhen Təhlükəsizlik Konfransının xüsusi buraxılışı keçiriləcək.

APA-nın Münhen Təhlükəsizlik Konfransının saytına istinadən verdiyi xəbərə görə, xüsusi buraxılış fevralın 19-da virtual formatda baş tutacaq.

“Davam edən pandemiya səbəbindən bu il fevralda keçiriləcək Münhen Təhlükəsizlik Konfransı 2021-ci ilin növbəti aylarına təxirə salınmalı oldu. Lakin, yüksək səviyyəli liderlərə bu kritik anda müzakirələr üçün qlobal platforma təqdim etmək üçün biz xüsusi buraxılışa ev sahibliyi etməyə qərar verdik. "Qərarsızlığın arxasında: Transatlantik əməkdaşlığın yenilənməsi, qlobal çağırışlarla üzləşmək" başlığı altında keçirilən xüsusi buraxılışda transatlantik alyans daxilində əlaqələrin yenidən necə qurulacağı müzakirə ediləcək, transatlantik və beynəlxalq əməkdaşlığın ən çox tələb olunduğu sahələrə toxunulacaq”, - deyə Münhen Təhlükəsizlik Konfransının saytında bildirilib.

Xüsusi buraxılışda ABŞ Prezidenti Co Bayden, Almaniya kansleri Angela Merkel, NATO Baş katibi Yens Stoltenberq, Avropa Komissiyasının prezidenti Ursula von der Leyen, ÜST-ün baş direktoru Tedros Adhanom Qebreyesus, ABŞ Prezidentin iqlim dəyişikliyi üzrə xüsusi elçisi Con Kerri, “Microsoft”un prezidenti Bill Qeyts çıxış edəcəklər.